يوميات هربان في رمضان: مراكش |الحلقة 7|

من طرف

هربان في رمضان

message N° 7

Jawad faïz <[email protected]>

To :[email protected]
1 juillet 2015 10:59

أعتذر لأني ماسيفطش الإيمايل المرة الفايتة، حيت كنت مشغول مع شي أمور حسيت بأنها أكثر أهمية فهاد المرحلة واللي غادي نعاودهوم ليكوم من بعد.

لمن فاتته الحلقة السادسة : يوميات هربان في رمضان: سباتة 04 |الحلقة 6|

آخر مرة كنت مشيت مع أمين، اللي هو شاب مقبل على العشرينيات، للدار فين ساكن من بعد مالقاني مجرتل وفي حالة يرثى لها فمراكش. ارتاحيت فالدار ديال أمين، هاد الراحة اللي قليل ماكانحس بيها عند شي حد، ممكن حين فتح لي قلبو، عاملني فحال الأب دياولو، حكى ليا أنهم عائلة على قد الحال باللي واليديه ميتين وختو الكبيرة هيا اللي كاتخد وكاتقريه، وباللي هاد العام عندو الباك ولكن منجحش فيه، باقي غادي يدوز الدورة الإستدراكية. تفكرت ديك الساعة نهار مات الأب ديالي، كان عزيز عليا بالرغم من أن العمل ديالو كان تيحتم عليه مايجيش للدار ديما، كنت فالسنة الأولى فالجامعة مين مات، ماكنتش تانساين فقدان شي حد قريب ليا بزاف خصوصا فبداية المرحلة الجامعية، ومنقدش نوصف الإحساس ديال أمي من بعد موت المعيل الوحيد فالأسرة. ولكن ماعندك مادير، هادي هي الخدمة مع المخزن. كان خصني نخرج نخدم باش نعاون الدار ونقرا فنفس الوقت. كانت مرحلة صعيبة بزاف، ولكن من الخير دازت ووصلت لداكشي اللي بغيت، أني نولي أستاذ ديال الرياضيات.

أمين باقي خاصو يوجد للدورة الإستدراكية وأنا أستاذ، يعني ممكن ندير شي حاجة مزيانة، ممكن نعاون واحد الإنسان اللي تايمر الآن بواحد المرحلة صعيبة ونعاونو بما أمكن يتجاوزها. داكشي اللي درت، مشيت شريت شي كتوبا ديال الرياضيات والفيزياء على أساس أننا نديرو كل يوم 10 ديال السوايع ديال الخدمة. الدري عقلو خفيف، مكانتعطلوش فالتمارين بالمرة تعجبت علاش منجحش. مبغيتش نقول ليه باللي أنا هو الأستاذ اللي سرب الماط، حيت ممكن يكون داك الامتحان اللي عاودوه هو السبب باش جاب الإستدراكية. مبغيتوش ياخد عليا نظرة خايبة.

11657318_10200768922303561_1126743373_n

واحد النهار قاليا غادي نخرج باش يجيب شي تقضية نقادو ماناكلو، واش تمشي معايا؟ أنا كانخاف نخرج ويشدوني. راه واخا عارفيني كاين فمراكش، من بعد ما لاوحت التيليفون مابقاوش قادرين يعرفو فين كاين بالضبط، اعتذرت ليه وقلت لو غا خليني نتكا شوي نرتاح لاش ناكلو ونكملو الخدمة. بقيت فالدار بوحدي، شويا كانسمع الباب كايتحل وهي تبان ليا خت أمين دخلات وجاية عندي. حشمت والفريخ بغا يهرب و تايغوت “وااااااا العربي ترجل وماتحشمناش”، يدي كايترعدو وبداو يعرقو غابوحدهوم.

– السلام السي العربي، أنا هدى خت أمين.

أححح على هدى، دخت أنا ديك الساعة، بقيت ساكت وهي تعاود تهضر.

– السي العربي لاباس، أنا خت أمين..

جمعت راسي وأنا نجاوب: آه سمحيليا بزاف، مارضيتش البال راني عيان شويا .. كيدايرا لاباس؟

-وي بخير، شفتك عيان، تعشيتو ؟ نقاد ليك شي حاجة تاكلها ؟

– لا لا بلا ماتعدبي راسك.. را أمين مشا يجيب شي سخرة وغادي نقادو أمورنا راسنا .. وعافاك عيطي ليا غا العربي بلاش ديك سيدي.

– لا هانية ماشي مشكيل، أصلا تعطلت شويا على أمين وخص يرجع يلقى الماكلة واجدة باش مايضيعش الوقت وتكملو الخدمة.

صافي قلت نخليها على خاطرها وطلبت أني نعاونها حيت تاهيا عيانا وعاد جات من الخدمة، قالت ليا بلاش فاللول ولكن بقيت عليها حتا وافقات. مشينا الكوزينة تانقيو الخضرة باش نقادو طاجين، بقينا كانتعاودو. عاودت ليها كيفاش تاوليت أستاذ والمحنة اللي دازت عليا من بعد مامات الواليد، والخدامي اللي دوزت. أيام كنت تانخدم فالعراسات، وشي مرة كنت تانخدم فالبني والصباغة ديال الديور. موهيم عاودت ليها كيفاش تاوصلت أو وليت أستاذ، ومين قلت ليها باقي عايش مع الواليدة تعجبات بزاف. قالت ليا نتا خدام خدمة مزيانة علاش مامزوجش؟ قلت ليها باللي الواليدة قاسات وعانات بزاف على قبلي، مابغيتش نتزوج شي مرة اللي تبعدني عليها، أولا ماتهلاش ليا فيها، داكشي لاش كانساين حتى يجيب ربي شي بنت الناس. سولتني أيضا على هاد الشعكاكة، قالت ليا واش تانتا كنتي معا دوك صحال الهيبي داكشي لاش مخليها، قلت ليها لا غي ولفتها وصافي، وقلت ليها باللي اينشتاين هو القدوة ديالي وعزيز عليا داكشي لاش مخلي الشعر وداير بحالو. وهي تقول ليا هاداك را ماشي مسلم وربي ماتيبغيناش نتشبهو بالكفار، حيد داك الشعر ورجع تصلي، بقا تمشي تانتا للتراويح والصلوات فالوقت. السيدة قنعاتني، وصافي عولت لاغد ليه غادي نحسن باباها هاد الغوفالة. بقات ليا فبالي هاد الهضرة اللي قالت، وبقيت تنفكر، هذا رمضان وأنا ماكانصلي ما والو، خصني نرجع لطريق تالين أنا أنبقى فحال هاكا، ديك الساعة نيت جمعت الوقفة، ومشيت توضيت وصليت شي ركيعات واستغفرت الله عز وجل وطلبتو يتوب عليا ويرد بيا للطريق. ساليت لقيت أمين دخل أو واقف هو وختو تايشوفو فيا بنظرة دهشة مخلطة بإعجاب؟ ممكن مافهمو والو فيا حيت عمري صليت قدامهوم، تا أنا را مافاهم والو فراسي، أصلا من هادي شحال مافهمت راسي ماشي النهار اللول هادا.

يتبع…


(القصة خيالية، كل تشابه في الأسماء أو الأحداث نابع من الزهر للي كايهرس الحجر، وشكرا.)

السيناريو نتيجة عمل ثلاثة محررين : رضوان، يونس وأسامة.

طالب علم ... شغوف بالفن، الموسيقى و المطالعة... انساني و مدون في سيرة أتعس السجناء. أحلم بعالم بدون ظلم، فقر، شقاء و جوع... سيتحقق هذا يوما ما بفضل أبطالي و منقدي اللإنسانية : العلماء.

مقالات لكل زمان

6 يونيو 2016

10 أنواع الأشخاص عند استيقاظهم في الصباح الباكر

18 أبريل 2017

10 أسباب تجعل من إفران أجمل مدينة مغربية

19 مايو 2016

10 عناصر أساسية يجب أن تضعها في حقيبتك قبل ذهابك للتخييم

2 أكتوبر 2016

5 أطباق سهلة التحضير لطلاب الجامعة والتي لا يتعدى ثمنها 20 درهما

23 مارس 2016

مجموعة من الجرائم لشياطين صغار ستجعلكم تؤجلون حلم الأبوة والأمومة

12 يوليو 2015

يوميات هربان في رمضان |الحلقة 11| الاستعداد للمواجهة

4 مايو 2017

10 أشياء تميز طلبة الطب بالمغرب

7 يونيو 2017

ستارتر باك: سيرة حياة المعلم المغربي

21 أغسطس 2016

8 أسباب ستجعلك تبدأ بمشاهدة مسلسل SUITS فورا

4 سبتمبر 2016

10 أشياء تعبنا من رؤيتها يوميا على الشاشة المغربية

مغربي يُرقِص أمريكيين على إيقاعات موسيقى الشعبي

أغنية 'هاك أماما' بصوت أسماء لمنور

ماذا إن كان كبور أحد المشاركين في مهرجان موازين ؟

يوميات هربان في رمضان: مراكش |الحلقة 7|

من طرف أسامة اعقيقب