سلسلة رمضان : يوميات راضية (الحلقة 3)

من طرف

صحابي وصحاباتي، توحشتكم بزااااااااااااااااااااااااف وتوحشت نشكي عليكم، كيف العادة.

سلسلة رمضان : يوميات راضية (الحلقة 2)

راكم باقيين عاقلين على شنو وقع المرة الفايتة وكيفاش وحلتها للسيدة وكانت هاتموت، ما تخافوش هاداك هي فشوش، السيدة لاباس عليها (وا بيني وبينكم شوية ماكانت هاتجيف وتموت فيها ههههههه، ولكن ربي حفظ هاد المرة).

الواليدة قلبات عليا صافي، زعما تخاصمنا وعاقباتني، والواليد كايصلح الخواطر ويقول ليها واصافي راه رمضان هذا والعواشر والبنت باقا صغيرة هاسمحي ليها. أما داك السفريطة ديال رحاب عاد ماكاتشعل العوافي وتقول ليها ويلييييييييييييييي يا ماما وراه السيدة كان على شوية وتموت لينا هنايا، وأنا هي ساكتة وكانتحلف فيها نشدها بين يديا داك البرهوشة نعلقها فالحيط، هي بلاتي.

المهم دازت صيمانة ما كاين هي السلام بيني وبين الواليدة، حتى واحد الصباح فيقاتني باش نوض نعاونها فالدار، حتى شوية كانسمعو السونيط فالباب، جينا نشوفو شكون جا : لقيناها جدة هنية، وهااااااااااد جدة هنية راه وتقولوووووووووووووو واش كاتفاهم مع الواليدة، هادي راها الأم ديال بابا والدفاع الوطني ديالي. الواليدة تبغي تغوت وهي دور فيها جدة هنية، والله ماتعاود دور حدايا، المهم أنا كاندير ليبغيت فالحضور ديالها وهادشي ليكايزيد يحمقني فيها.

زدت فرحت منين قالت لينا جدة هادوز معانا 3 أيام ديال رمضان، وقلت الله هادي فرصة نتفشش شوية وندير ليبغييييت ساعات شكون خلاك، هاديك الجبهة المعارضة ديال رحاب كاتمشي توصل لماما كلشي، وبالطبع هي بالدور ديالها كاتقيد عليا هي تمشي جدة ويبداو القنابل الصروخية.

اليوماين الأولى دازو بيخير وعلى خير، حتى للنهار الثالث ديال رمضان. فطرنا وسالينا وبدينا نتفرجو فواحد المسلسل راه عزيز على جدة سميتو « سر المرجان » كايدوز ف 2M، إيوا قاتلك جدة كاتفرج فيه حيت هاداك البطل ليسميتو الحبيب كايفكرها فجدي الله يرحمه وكاتفكر ياماتها معاه، إوا حررررررررررررررر بشششششششششششش شي حد يتكلم والمسلسل دايز وهي كايبدا الحبيب يهدر جدة كاتبدا تعاود المغامرات ديالها مع الحبيب ديالها هههههههه… ماكانعرفو واش نتبعو قصتها ولا القصة ديال المسلسل. ما علينا، حنا صابرين ونفس القصة كاتعاود كل نهار ولكن أش هانديرو مكتاب الله نسمعوها، وتعاويد الناس الكبار خاصهم الخاطر (ويلي ويلي على راضية دارت العقولات وبدات كاتهدر كيف الناس الكبار ههههه).

ep3

المهم أسيادنا سالا المسلسل وهي دور عندي قاتلي أبنيتي أراضية زيدي نخرجو مورا التراويح نسرحو رجيلاتنا شوية فالمدينة، قلتليها واخا على راسي وعينيا ما ربما نلقاو ليك شي الحبيب جديد ههههههه. إيوا وهي تجرني من شعكاكتي وقالتلي وا نوضي تلبسي وزيدي قدامي، راه جدك منو واحد وماكايتعوضش و… ويالله بغات تبدا القصة من جديد قلت ليها : صافي والله هادي والتوبة أنا نايضة نلبس ونخرجو، ومالي أنا مسكينة على هاد الزهر ليبنت ليه فالبلان كايجرني من شعكاكتي، يالاه أنا غادية جوج دقايق وانا معاك.

رحاب بغات تجي معانا، قالت ليها جدة ألا أبنتي ماتخليش ماماك وحدها حنا نخرجو دغيا نجيو، واناري شحال فرحت السفريطة ماهاضيقنيش حتا فهادي.

إيوا هي هاديك، لبسنا وخرجنا وشوية وصلنا للسويقة وقفنا عند واحد مول الجلالب عجبو جدة، إيوا مول الحانوت رحب بيها وجاب ليها كرسي فين تكلس وهي تقولي جدة عافا بنتي سيري جيبي ليا شي قرعة ديال الما راه الحانوت قدامك وأجي.

أنا ماعرفتش باش تبليت، مشيت عند حانوت أخر إيوا باش بغيت نرجع تلفت، الظلام كايبان ليا والدنيا عامرة ومالقيت جهد، بقيت واقفة فبلاصتي وبديت ندمع تخلط عليا كلشي ومابقا قدامي هي حل واحد، نعيط للواليدة تجي تفكنا هي عارفة المدينة شبر شبر، أنا يالاه جبدت التلفون وحسيت بيد تحطات على كتفي وسمعت : رااااااااضية…

ترقبوا  التتمة والحلقة الرابعة والمقبلة يوم الجمعة على نفس الموعد.

أعيش اليوم على أنه أخر يوم في حياتي فان لم يكن اليوم سيكون غدا.

مقالات لكل زمان

10 أنواع من الأصدقاء المغاربة

حوار لطالما أردت أن أجريه مع أم توفي ولدها غرقاً في البحر

12 فرقة موسيقية عربية أعادت المجد للغة العربية، إكتشفوها ..

23 نجما يجب أن يقولوا 'شكرا' لطبيب أسنانهم

11 علامة تؤكد على أن صديقك أو صديقتك مزيف(ة)

كيف تقوم برصد صديقك 'الكسول' في الدراسة؟

ماذا لو كانت اللوحات الفنية المشهورة تتكلم بالدارجة – الجزء الثاني

لنذهب في رحلة إلى... : اليونان، بلد الجزر والحضارة الإغريقية

التفسير العلمي لعبارات مشهورة تقولها كل أم مغربية على غرار ”ويلا جيت دابا ولقيتها”

9 أشياء يفعلها معظم المغاربة لتسهيل حياتهم