هربان في رمضان
message N°14
تسنيت جواد حتى جا لعندي.. قاليا والا بد نرجعو عند الحاج عبد السلام وغادي تقوليه باللي راك قابل الخدمة معاه، ولكن بشرط ديك الساعة أنا اللي غادي نتكلم، ومشينا رجعنا لعندو وقلت لو أشكاين.. فرح بزاف، ديك الساعة تكلم جواد وقالو باللي راه البوليس تايقلبو عليا وخاص نمشي نسلم راسي ليهوم، وباش مايشدونيش خاص تضحي بشي فورنيسور صحيح ديالك، يكون بهيبتو ومحمق البوليس.. الحاج ماترددش، قالينا تا هادا نظر، أصلا عندي كثار وإذا مشا واحد يعوضوه وحدين، عيط على واحد خونا وقاليه جيب ليا الضوسي ديال خالد ڭواضا، تايبيع الشراب والزطلة للبزناسا فسلا وساكن هو فالنوايل فسيدي موسى. قاليا الضوسي را فيه لبلانات اللي دار من 2006، بدا تايزعم عليا هاد اليامات وهادي هي الفرصة باش يتربا. تسالمنا ودرت معاه غادي نرجع من بعد سيمانا، بينما فضيت أموري مع البوليس.
لمن فاتته الحلقة الثانية عشر: يوميات هربان في رمضان: |الحلقة 13| البوليس ولا الشفارة؟
سالينا مع العصابة وقاليا جواد دابا والا بد نرجعو لكازا ضروري اليوم، بلا مانساينو تال غدا! الصراحة باقي مبرزط ومافاهمش لبلان ديال جواد. قلتلو واخا أسيدي، ولكن خاص تجيني للصراحة وتعاود ليا أشنو تحت راسك، قاليا غاكون هاني فالطريق نعاود ليك ومشينا للمحطة، شدينا التران من طنجة وبدا يعاود ليا.
– » عقلتي على مين جا عندك صاحبك الأستاذ وعاود ليك على بنت الحاج عبد السلام تخدم معاها الماط، هاداك راه أصلا ماشي أستاذ.. هاد العام أول مرة غادي يقري، وماكانش فالصويرة قبل… وإنما هو خدام معا البوليس، هاد السيد اللي ضصر عليك ورديتيه صاحبك، مشا عند الباطرون عاود ليه قبل عليك وأنك دمدومة ويقد يستافد منك، والبوليس كذلك ماعندهوم مايديرو بيك، إذا شدوك.. وباش يستافدو منك تاهوما داروك طريق للحاج حيت عارفين بنتو مكلخة وهو باغيها تنجح باش يصيفطها لبرا يبعدها على المشاكيل.. هادشي كامل حيت الهدف ديالهوم هو خالد ڭواضا اللي كابفرق الزطلة على البزناسا فسلا.. كانو عارفينك يا إيما غادي تجيب ليهوم الحاج عبد السلام أولا خالد، وهادشي اللي غادي يوقع الأن.. »
– بلاتي وكيفاش نتا كاتعرف هادشي كامل ؟؟
– « راه ماقالو عليك دمدومه حتى كنتي بصح مكلخ، يا العربي أنا خدام من هادي شحال مع البوليس.. دابا راه غادي نولي مع FBI ديال المغرب.. نتا بغيتي قصتك تنشر على welovebuzz، وواخا درتي أسماء مزورة را عارفينك نتا، لاباس ملي كنتي كاتعطل كلا مرة بيومين عاد كاتسيفط الاميل راه بسبابي باش ميكين عليك. الموهيم هاحنا وصلنا، دابا نيت نمشيو نقضيو الغرض »
غانزلنا قبطنا طاكسي حمر لولاية الأمن، جواد معروف مزيان تما.. مشينا تادخلنا عند الضابط الزهاني.. قاليا مرحبا بيك، توحشناك غبرتي علينا هاد رمضان كامل، صخط عليه وبقيت تانهلل ونغوت وجواد تايبرد فيا… حسيت براسي ديك الساعة فحال شي بيدق دارو بيا مابغاو، قلتليه را كولشي فخباري باغيين هاد الضوصيي.. قادو ليا وراقيا دابا باش مانبقاش متابع وخليوني نمشي فحالي، ماهضرش ڭاع ولازاد شي كلما من بعد ماشاف داك الملف المنحوس. قاليا تسنا 5دقايق مشا فيها وجا جاب ليا ورقة فيها شي تخربيق، قاليا دابا راك حر.. سير فحالك سالينا منك.
ديك الساعة، حتى جواد ماعاودش هضرت معاه، شديت طاكسي لسباتة ومشيت نشوف الواليدة… توحشتها بزااف، معا الدخلة لقيتها ڭالسا فالمرح، الدموع سالو ليا ومابقاوش يحبسو.. طحت عليها بحال شي واحد 20 عام وهو فالحبس عاد خرج منو.. بقات تعنقني وتبوس وتقوليا فين غبرتي ياوليدي عليا وخليتيني بوحدي.. قلت ليها ولد ختك يا لميمة اللي دارها بيا.. ڭدمني فواحد الموصيبة بلا مايحن فيا ولايدير بوجهك وبقيت نعاود ليها أش وقع وفين مشيت وأشنو دوزت… كايبقا فيك الحال مين الشخص اللي كان الأقرب ليك يلصق ليك شي مشكل قد هادا، وبعض المرات ناس ماكاتجمعنا بيهوم تاشي قرابة تايصدقو ونعم الخلق والمعاملة، ديك الساعة تفكرت أمين وختو هدى.. مشيت هزيت التيليفون ديال الدار واتصلت بهدى، سولتها أش دار أمين فالباك قالت لي نجح.. فرحت ديك الساعة بزاف قلت ليها باركي ليه، واعتذرت بزاف وواعدتها باللي غادي نرجع نشوفهوم غدا.
(القصة خيالية، كل تشابه في الأسماء أو الأحداث نابع من الزهر للي كايهرس الحجر، وشكرا.)