يوميات هربان في رمضان: طريق أَوْرِيرْ |الحلقة 4|

من طرف

هربان في رمضان

message N°4

Jawad faïz <[email protected]>

23 juin 2015 00:09

أول حاجة درت من بعد ما هربت ليهوم هي أني جاوبت على المكالمة ديال جواد. هضرت معاه وقالي باللي العصابة وصلاتها الخبار باللي راني كاين فجوايه أكادير، وأنهم ارتاحو حيت هربان وفنفس الوقت باغيين يلقاوني، سولت جواد شناهيا الطريق اللي مزيانة، اللي مايكونوش فيها الباراجات ديال البوليس أولا الدرك بزاف باش نشدها بالكاميو. وقاليا طلع من جيهت أورير وقلب على شي قنت خاوي ولوح فيه الزمر عليك، وداكشي اللي درت. ولكن المشكل هو أنه آخر مرة حاولت نسوڭ فيها شي حديدة كانت شي عشر سنين دابا، وخا هاكاك خاطرت في سبيل حريتي وباش مانمشيش خلا. خاطرت محاولا قيادة هاد الرموك، وهادشي باش نحاول نبعد من داك المخفر ديال الدرك الملكي ما أمكن، نخلي الحديد الثقيل فشي خلا ونزيد. بقيت تانفكر فالحسين والخير اللي دار فيا، ومين لقيت كيفاش نسلت ماعقلتش عليه، ولكن راه أي واحد غادي يتحط فالموقف ديالي غادي يدير نفس الفعلة.

لمن فاتته الحلقة الثالثة:يوميات هربان في رمضان |الحلقة 3| -أكادير: الجزء الثاني

لأن نسبة كبيرة ديال الناس براغماتيين فبحال هاد المواقف، تاينساو للأسف داكشي الزوين كامل اللي درتي معاهوم، متايعقلوش عليك وتايوليو يدربو غا على راسهوم. ماتايهمش الأخلاق أو واش هاد التصرف مزيان أولا، الموهيم هوا ماتجيش فيا الدقة.

ماعليناش، بقيت مقاتل مع باباه هاد الكاميو تا ناض الموطور وتحركت، بقيت شاد الطريق ديال أورير وكانقلب فنفس الوقت فين نتفك من هاد المصيبة ونزيد نكمل طريقي. الكاميو غادي وأنا مقاتل معا الطريق، كانت واحد الشميشة يالله خارجة داك الصباح يا سلام، خدمت الراديو لقيت واحد الإذاعة طالقين شي موسيقى زوينة. خلينا من دوك المغنيين ديال الخشيبات اللي لا موسيقى لا كلمات زينين، لقيتهوم طالقين Coming back to life ديال بينك فويد. ماتيقتش فلول بقيت تانساين، تنقول فنفسي ياك الراديو ديالنا تايدوزو فيه غير سعد لمجرد، شوقي ودوك الأشكال اللي بحالهوم؟ زعما هاد الإذاعة خدمات شي واحد تايتمزك مزيان، الموهيم بدا David Gilmour يغني، طارت القطعة وطار الجوع، 8 دقائق دازت بيها طويــــــــــــلة، عشت مع الأغنية وحسيت فواحد الوقيتة باللي ماتابعني والو، نسيت باللي البوليس والجوندارم تايقلبو عليا وحتا الباطرون عبد السلام. مكرهتش كون ماتسالاتش ديك الأغنية، ولكن للأسف انتهت ومعاها بدات الخطبة، بان ليا واحد الكوان مليح قبل ماندخل تاغازوت. طفيت الخطبة، ماعندي ماندير بمشاكيل العالم. الهم اللي فيا يكفيني، هبطت السرعة بشويا وخرجت من الطريق وأنا تانضرب على واش كاين بنادم ولا لا، بانت ليا القضية مسلكة وحس بنادم مكيضورش، هناك حيث أنا وزقزقة العصافير صافي. حطيت الكاميو، هزيت التخربيق ديالي وبعدت على الكاميو فحالا ماكنتش فيه، بقيت كانتمشى وفنفس الوقت داير ل »أوطوسطوب ». هاد المرة ماتعطلش الفرج بزاف، قبل ماتدوز ساعة حبسات واحد السيارة قلتلو فين غادي، قاليا غادي ألعزاوي لمراكش. قلت فخاطري دابا واش أنا عزاوي وجاوبتو: أيه سير عالله.

هاد خونا مين طلعت وهوا فارع ليا راسي بالمخزن صعيب وخص نتفكو من الوصاية اللي دايرها علينا ومانبقاوش نخافو، ونهدرو على حقنا، خاصنا نقاطعو الانتخابات حيت داكشي خادايرينو ديكور وتايربح الحزب اللي بغاو، خاص إذا بغينا نزيدو لقدام نديرو نظام تعليمي جديد مناسب للمغرب ماشي نظام استعجالي. ناري ياربي أنا طايب هم ومشاكيل، شهادشي تسلط عليا. وأنا نقول لراسي راك مامسحرش بلا ماتبخ راسك معاه. لا مجاتش، صافي قلت نبقا ساكت. شوي السيد جبد باكية ديال وينسطون وبغا يشعل ڭارو. وأنا نهلل واواواواواواوا راحنا معاك صايمين أخويا، حتارمنا الله يحفظك. قاليا مالي أخويا أشدرت ليك، قلت لا والو غا شاعل ڭارو فنهار درمضان ومعاك بنادم ماراعيتي ماوالو لينا، راهادشي سميتو محاولة زعزعة عقيدة مسلم وراك كاتستفزني. قاليا أخويا مين كاتشوف دوك النصارى تاياكلو فالزنقا، هادوك لا يستفزونك أولا هادوك بشر وحنا حيوان؟ ناري صعّرني هادا، غادي نترمضن عليه. جبت داك الفردي اللي خديت من عند الجادارمي وأنا نحطو لجد باباه عند الراس وأنا نقوليه غادي طفي داك الڭارو ولا نفرڭع ليك هاد الراس، راني مخاسر والو وماتابعني والو. مطالعاش مطالعاش، آخرتها حبس. السيد صقل، تكمش وطفا الڭارو، قلت لو يوصلني لشيشاوة. بقينا الطريق كاملة ساكتين حتا وصلنا لهاد المدينة، تفكيت منو بالخف ومشيت طاير تانسول على الطاكسيات اللي تايديو لمراكش، لقيت وحدة بقاو فيها جوج بلايص خلصتهم، ڭلست بوحدي لقدام وزدنا. وصلت وباقي ساعة للفطور، خاصني نتصل بجواد باش نقاد أموري، وخاص يضبر ليا على فين نفطر وفين نبات.

يتبع…


(القصة خيالية، كل تشابه في الأسماء أو الأحداث نابع من الزهر للي كايهرس الحجر، وشكرا.)

السيناريو نتيجة عمل ثلاثة محررين : رضوان، يونس وأسامة.

طالب علم ... شغوف بالفن، الموسيقى و المطالعة... انساني و مدون في سيرة أتعس السجناء. أحلم بعالم بدون ظلم، فقر، شقاء و جوع... سيتحقق هذا يوما ما بفضل أبطالي و منقدي اللإنسانية : العلماء.

مقالات لكل زمان

10 أسباب تجعل من المغرب أفضل دولة في العالم

إختبار: ماهي درجة إخلاصك في العلاقات؟

20 أغنية رومانسية ستتعرف عليها كل مغربية مُتابِعة للمسلسلات التركية

10 أكلات غريبة الإسم ستجدونها في المغرب فقط

9 أشياء تزعج الفتيات المغربيات

10 دروس تعلمناها من 10 رسوم متحركة شاهدناها في صغرنا

دليلك الشامل للاستمتاع بمدينة الرباط خلال مهرجان موازين

الدليل الشامل لعبارة الفتيات المغربيات الشهيرة 'والو'

المغربيات رفضن على الأقل واحداً من أصحاب هذه المهن

حقيقة أشخاص عثروا على توائمهم بمحض الصدفة