كل اختصاص يتميز بطلاب يمكن التعرف عليهم من خلال بعض المواصفات. وطلاب الحقوق لهم 10 علامات تجعل منهم طلاب متميزين عن غيرهم ب:
1. كثرة الدروس
ما كاينش لي ضهرو طايح بقوة ما هو غادي جاي هاز كومة ديال الوراق.
2. القهوة هي الفطور وهي الغدا وهي العشاء
القهوة كاتولي كاتشرب فحال الدواء، هي الوسيلة الوحيدة باش يبقاو فايقيين.
3. كثرة الفهامات
ما تحاولش تناقش معاهم، يندموك بقوة الفهامات.
4. المدرج فحال سوق الأربعاء
واحد شعبة القانون بالعربية كايعمرو داك المدرج فحال الفيران.
5. الضحكة ما كاتبدا عندهم حتى العشية
إلى لقيتي شي واحد فيهم مغوبش عرفو صبح على وجه شي أستاذ فيه قوة الهدرة. فهمنا الأساتذة فيهم الهدرة، ولكن شنو هاد النشاط لي كايطيح عليهم سيدي ربي على 8 ديال الصباح.
6. صحاب القانون بالعربية والفرنسية ما تايتعارفوش
كل واحد فيهم كايقرا فجهة.
7. يقدرو يتلاقاو فجوج حالات
في حالة مشاو ياكلو فالكافيتيريا، ولا فحالة المكتبة. ومع ذلك، قليل تلقاهم مجمعين إلا إذا كانوا صحاب من قبل.
8. في حالة ما إذا سولتي صحاب القانون بالفرنسية أشنو كاتقرا..
كايجاوبك juriste، وبواحد النفخة تقول هنا نبات السيد واصل لشي منصب ديال رئيس شركة المحاميين بالمغرب.
9. وفي حالة ماإاذا سولتي خوتنا فالله صحاب العربية…
كيف العادة فموضع ما يجاوبك بجواب واضح كايولي يعرض عليك قضية رأي عام، المهم راكم فهمتو السيد مشا بعيد كايتخيل راسو نيشان قاضي.
10. صحاب القانون أكثر الناس مهمومين
ديما ودائما وأبدا تفكيرهم الوحيد وهو الدرس وشنو هايدوز فالدرس وشنو هايدير الأستاذ وناري هادي وعنداك هادي… موسوسين يا ربي السلامة.
وا طلقوها تسرح ومولاها ربي.
