يوميات هربان في رمضان |الحلقة 13| البوليس ولا الشفارة؟

من طرف

هربان في رمضان

message N°13

Jawad faïz <[email protected]>

17 juillet 2015 20:05

الحاج عبد السلام داخل وكايتفرج فيا بهاذ الحالة، تا هاذا حاج آ عباد الله؟ وعاطيها للحشيش وڭاع المصايب؟
– الحاج: طلقوا ذيك الدرية ما بقا عندنا ما نديرو بيها وديوها لدارها.
داير فيها جنتلمان سير الله يغبر لك الشقف، ولكن واحد الطرف مني رتاح صافي هدى عاترجع لدارها وعاتسالي هاذ المحنة اللي دوزات فابور بسباب أن خوها استاضفني…
واحد من العصابة فك الحبال من هدى وخرجها وهي بقات كاتشوف فيا وعينيها مغرغرين بالدموع بحالا كاتقول ليا ياك ڭلت ليك ماتجيش. وهيا غادا قلت ليها سمحي ليا، وهوا يطرشني واحد الحيوان وقاليا: مادويييشش !!

لمن فاتته الحلقة الثانية عشر: يوميات هربان في رمضان: |الحلقة 12| المواجهة 1

جا عبد السلام وريح فالكرسي اللي قدامي فين كانت جالسة هدى وقاليا بنتي نجحات وجابت مزيان فالماث، ما عندي مانسالك معلم، وبقا كايضحاك.. شويا قاليهم يفكوني، وملي فكوني شاف فيا فعيني وقاليا آش باغي دير دابا؟
قلت ليه عانخلي دار بوكم كاملين واحد بالواحد، تفرشخ بالضحك ثاني وقاليا: وانا نفهم كيفاش تا بقيتي هربان ڭاع هاذ رمضان را فيك واحد لعربي مجرم لداخل فيك.
تا آش كايخربق عليا هذا؟ شويا قاليا دابا حنا بغينا نشوفوك كيفاش كاتعامل مع الوضعيات، الميساج اللي لقيتي را كتباتو هدى ولكن حنا اللي بززنا عليها ديرو، كتبات ليك ماتجيش وجيتي… ماشي مشكيل قلبك هشيش داكشي لاش سلخناك شويا يا لمكلخ. دابا بيدنا نعطيوك للبوليس، ايه را عندنا علاقات مع البوليس آش كايصحاب ليك؟ ولكن انا عجبتيني صراحة وعانعطيك فرصة تولي حساسبي ديالي وتكون وفي ليا وعاتعيش عيشة الباطرونات.

– لعربي: والفيديو؟
– الحاج: تا شمن فيديو بغينا نشوفوك واش تقدر تحل فمك تحت الضغط.
دابا حنا عانطلقوك ولكن كيما لقيناك المرة لولا را عارفين كيفاش نلقاوك ثاني، ميعادنا بعد غدا باش تبدا معانا.

داوني واحد جوج من العصابة، خشاو راسي فخنشة وداوني برموك ولا ماعرت كاميو وحطوني فواحد الخلا، واحد فيهم عطاني سمارتفون وڭاليا ها باش عا تواصل معانا ولا عيطنا عليك جاوب.

خلاوني وسط الخلا تالف ولاحو ليا حوايجي فالتراب، كلي مبهدل..

بقيت كانتمشا فالشمس تا وصلت لشي بلاصة فيها البشر مشيت غسلت وجهي وفزكت حوايجي بالما شويا فواحد الروبيني وريحت كلي مبهدل وماعندي تا ريال، خاصني باش نعيط على جواد. مع مريح فواحد العتبة واحد داز ولاح عشرة دريال حدايا، بشاخ وليت كانبان طلاب، آ ودي صافي هيا هاذيك نيت، بقيت كانتشمش تا جات واحد المرة لاحت ليا درهم، جمعت ديك البركة ومشي لواحد التيليبوتيك وعيطت على جواد.

جواد: آلو، شكون؟
لعربي: عولت عليك بكري..
جواد: لعربي.. اوف الحمد لله، شدرتي معا العصابة؟
لعربي: تا بانت ليك عا العصابة؟؟؟ نسيتيني؟ دوز هزني من حدا واحد التيليبوتيك فشي قرية هنا فيها جامع كبير.
جواد: صافي عرفتك فين كاين هانا جاي تيت سويت.

دابا مابقيت عارف ما ندير واش نقول كلشي لجواد ولا نبعد منو ونولي مع العصابة، حياتي فين غادا؟

يتبع ..


(القصة خيالية، كل تشابه في الأسماء أو الأحداث نابع من الزهر للي كايهرس الحجر، وشكرا.)

السيناريو نتيجة عمل ثلاثة محررين : رضوان، أسامة، ويونس.

طالب باحث في علوم و تقنيات المعلومة و الاتصال، 24 سنة. عاشق للشاي و شاعر في أوقات الفراغ.

مقالات لكل زمان

20 صورة لن يفهمها إلا جيل الثمانينات

ماذا لو كانت اللوحات الفنية المشهورة تتكلم بالدارجة - الجزء الأول

نجوم Game Of Thrones في حياتهم العادية

10 أسباب وجيهة ستجعلك ترغبين بالبقاء عازبة لأطول فترة ممكنة

لديك شهادة جامعية وتفشل في كل مقابلاتك من أجل الحصول على عمل بسبب خجلك، إليك ما سيخرجك من قوقعة ”الحشمة”

أنا لا أستطيع قول ”أحبك” لأبي وأمي، هذا هو السبب ..

ياسمين حمدان: الصوت اللبناني الفريد من نوعه

12 سرا حول الفتاة المغربية

تعرف على أشهر دكتاتوري في المغرب .. لطالما اضطهدنا واستبدنا بسلطته ولجهلنا لم نقو على ردعه

هل تعرف مدينة مكناس جيداً لكي تحصل على 10/10 في هذا الإختبار؟