في المغرب، النشاط الترفيهي الوحيد الذي يلجأ إليه معظم الشباب هو كرة القدم، إما بمتابعة مبارياتها أو مزاولتها، نظرا لقلة الأماكن الترفيهية والظروف الملائمة لها. ومع ذلك في بعض الأحيان، لقلة الملاعب، تجرى المباريات بالشوارع والأزقة، ولهذا الأمر تأثير صحي عليهم، وعرقلة وإزعاج لمحيطهم.
إليكم عشرة أشياء تمر بها عند لعب مباراة كرة القدم مع أبناء حيك :
1. فيك ما يلعب شي ماتش؟
باش تجمع الدراري ماشي ساهل وخا تكونو كثار، قيل لي كاتسولو وكايجاوبك فالبلاصة، ولابد ماتدوز من استنطاق »فين؟ معاش؟ بشحال ؟ ….. »
2. معامن لاعبين؟
خاصك تشد مع شي فرقة، وخاصك تراعي لوجهة النظر ديال صحابك »هادو تايهرسو »، »هادوك مراض »، »هاداك جابد معاه الصداع »…
3. العكس والنحس
تقدر تلقى البترول وما تلقاش بالون، والمشكل إلى لقيتيه ماكاتلقاش الدراري، وإلى كانو الدراري ماكايكونش البالون.
4. سير تلبس
هنا تايبداو المشاكيل. ما تايهمش شنو تلبس الفوق، فإلى مكانش عندك توني أي حاجة قاسها جافيل، تقطعات، أو صغارت صالحة للعب. الإشكال تايكون فالسبرديلة، خود ليمنية من عند شي صاحبك واليسرى كاتكون موجودة غتلقاها فسطحكم ولا شي بلاكار قديم.
5. سير شد التيران
خاصك تسيفط شي واحد بكري باش يشد ليك التيران باش تفادا جملة »تلعبو معانا على التيران ».
6. القوانين
قبل ما تبداو خاص تحددو واش لي ماركا كورة عندو بوطو خطوة ولا جوج، لاعبين وقت ولا بيوت، تحت الركبة ولا تحت السمطة…
7. كلشي حكم
قليل فين كيتختار شي حد من لي كايتفرجو حكم، التحكيم تايكون بالإجماع والإتفاق وغالبا اللي كايغوت بزاف هو الي عندو الحق.
8. الخطة
ماكينش الدفاع والهجوم، غير ماتبقاش تقلب بزاف ورجع إلى مشات ليك كرة، والحارس تايتغير مع الأهداف (واحد علينا جوج عليهم).
9. المعجم
مصطلحات مثل لايس وأزيرو، بيونافو… خاصك تكون متعود عليهم.
10. فرق الفلوس
مني تاتخسر تاتحاول تقلب على السبة باش يتحبس الماتش بأي طريقة… الله يسمح لينا.
