ستاريو، ألزا، الكرامة… تختلف الأسماء و الهدف واحد، الحرص على تنقلك. ولأن الطوبيس نعمة بحالو بحال الغابة، مغاديش تحس بأهميتو حتى لنهار يكون الإضراب، اخترنا لك مجموعة من الأشياء اللي غادي تخليك تحس بقيمتو وتعرف الأهمية اللي كايحتلها في الحياة اليومية ديالنا.
1. الرخا لله، 4 دراهم إذا غلا.
2. كاتلاقا فيه بجميع الأنواع ديال البشر ومن مختلف الطبقات الإجتماعية.
3. كايساهم فالتكافل والتعايش الاجتماعي.
وكاتشوف التجليات ديال الاحترام مين كايخلي شي واحد بلاصتو لشي حد أكبر منو أولا شي واحد مريش.
4. حيت كاتحافظ على البيئة.
الإستعمال ديال وسائل النقل الجماعية تيخفض من النسبة ديال الثلوث.
5. التيساع فالقلب.
شي معنق شي وشي مخشي فشي… وبيخير.
6. كيخليك تحفظ المدينة، حيت تايساريك فيها كاملة.
7. احتراف علم السليت.
حيت مستحيل واحد تايركب فالطوبيس ديما، ويكون عمرو ماسلت فيه.
8. حيت الطوبيس داير بحال الحرباء.
يقد يتحول من استوديو تحليلي ديال شي مباراة، إلى مائدة مستديرة تناقش فيها أي موضوع أولا برنامح ديال الركن المفتي
ويقد يتحول فبعض المرات لحلبة ملاكمة.
9. كايخليك تتعلم فن الانتباه والتركيز.
حيث كاتبقى حاضي من الشفارة.
10- وكاتحافظ أيضا على اللياقة البدنية ديالك…
بسبب الجري وراء الطوبيس الذي لا يقف ابدا في المحطة. والتسابق على الأماكن الشاغرة.
أسامة اعقيقب
طالب علم ... شغوف بالفن، الموسيقى و المطالعة... انساني و مدون في سيرة أتعس السجناء. أحلم بعالم بدون ظلم، فقر، شقاء و جوع... سيتحقق هذا يوما ما بفضل أبطالي و منقدي اللإنسانية : العلماء.