1. بنكيران

« أودي راجل مزيان داك السيد، أنا بعدا غادي نتوحشو، جراو عليه بالزربة، بغا يعاون بغا يصلح بغا يبدل، ولكن هادوك ماخلاوهش. الحاصول حتى إيلا ما دار والو المهم ما تايشفرش. »

2. العثماني

« أنا بعدا عمري ما سمعتو تا يهدر، ديما تانشوفو غي حدا صاحبو بنكيران ولكن دوز على الواد الهرهور ومادوزش على الواد السكوتي جالوها سيادنا. قالك أحقا ما حقا راه طبيب نفساني، أودي مزيان ملي هو طبيب ديال الحماق أنشوفو واش غايقد يداويلنا هاد الحماق لي فهاد البلاد. »

3. شباط

 » غي سيكليس، شد ديك فاس شي عشر سنين ما شفنا منو والو، شفنا غي الشفارة ولاو فكل بلاصة وفين ما هزيتي راسك المافيا ديال العساسا دالباركينات مشتتين، حتى دوك 2 مصانع لي كانوا خدامين طرقوا ومشاو ولكن ما تخافش عمرو ما يحكم حيت ما قاريش وأصلا فين ما يهدر دايرنا الصداع، ما عندك ما دير قالهالوا بنكيران الهبيل دفاس. »

4. العماري

« أخويا النوار فالنوار، ما عرفنا داك السيد كي دار خرجلينا، كنا جالسين ما علينا ما بينا حتى خرج وولا رئيس حزب، شفتي داك الفيديو ديالو المغرب جبل… أودي الله يعفو وصافي. »

5. لشكر

« غادي وتايتشدق، مشااااااات الوردة ضاعت. ايييه يا يام اليسار مع بنبركة وبوعبيد وصحابهم، شوف دابا الوردة كي ولات، لا استقلال ولا اشتراكيين ما بقاو نافعين، جاع القدام ماتوا. »

6. منيب

« تاتعجبني داك السيدة، تاتجيهوم كود، معندهاش مع لغة الخشب والهدرة الخاوية وداكشي، تاتجي تاتقولهوم داكشي لي كاين نيشان. ولكن تانحس بيها عاجبها راسها، تواضع معانا شوية، إيلا تانبغيو بنكيران غي حيت تايهدر معانا بالساهلة ماتايصعبهاش. »

7. أخنوش

« لو كان بقا غي فالتجارة ديالو حسنلوااا. كان وزير معين خدام مزيان ما تايهدر معاه حد، دابا ايدخل معاهم لداكشي ديال السياسة والأحزاب والنقابات وماكاين غي شدلي نقطعلك. »

8. ساجد، بن عبد الله، مزوار…

« هادوك الناس غيييييي منشطين معاهم البطولة، تايعمروا بيهم التقابي ما فيدهمش. »

9. حصاد

« أخويا كاين حكومة وكاين الداخلية. داك الوزارة ما تايشدها غي اللي بغاو ما كاين لا انتخابات لا والوا، كيان اللي تايبغيوه تايطلع تما. »

10. شكون هوما؟

« نوض نوض مشيو فحالنا، عاش الملك. »

The post في المقهى المغربي: السياسة بلسان الشعب المغربي appeared first on Welovebuzz - عربية.