message N°14

(القصة خيالية، كل تشابه في الأسماء أو الأحداث نابع من الزهر للي كايهرس الحجر، وشكرا.)

The post يوميات هربان في رمضان |الحلقة 14| الحلقة الأخيرة appeared first on Welovebuzz - عربية.

message N°13

(القصة خيالية، كل تشابه في الأسماء أو الأحداث نابع من الزهر للي كايهرس الحجر، وشكرا.)

The post يوميات هربان في رمضان |الحلقة 13| البوليس ولا الشفارة؟ appeared first on Welovebuzz - عربية.

message N°12

وانا غادي فالطريق تفكرت بلي العصابة ماقالو لياش بالضبط فين نمشي، والمعلومة ديال أنهم شادين هدى فأصيلة عرفتها غا من عند جواد. هادشي ماشي هو هاداك، شي حاجة ناقصة.
ماعرفتش واش نشد الطريق لأصيلة، ولا نبقا غا كاندور فطنجة، ولا نمشي للدار ديال الحاج (الشاف د العصابة)… من جهة، ايلا مشيت للدار، ماغانلقاش هدى، على حسب ماقال لي جواد. ومن جهة اخرى ايلا مشيت لأصيلة آيعرفوا بلي انا عندي شي مصدر كايسقيني بالمعلومات، ويقدر هاد الخطأ يكون مرادف لحكم بالإعدام عليا وعلى هدى، وماشي بعيد… حتى على جواد.
ناري راسي آتيفرقع، وا توحشت نكون غا مسالي راسي، حاط شي صينية د آتاي وداير رجل فوق رجل، وعاصر على شي جلسة برلمانية مدوزينها فالقناة المغربية العجيبة ديالنا. توحشت راسي يكون كونجي وماكايخدمش، أما دابا ماكايوقفش، بكثرة الهم، الشوك آيبدا ينوض ليا فالراس.
خشيت يدي فجيبي نجبد التيليفون، مالقيتوش، آه نسيت بلي لحتوا !
مشيت لواحد التيليبوتيك شريت واحد تيليكارط، مول التيليبوتيك قاليا، غي دوز لابيل ديالك هنا، بلاش من التيليكارط، ولكن انا لحيت عليه، مابقيت كانتيق فحد، على الأقل، التيليكارط، ايلا قرب شي حد يتسنط عليا انشوفو.
مشيت لأقرب بوسط ديال تيليكارط، دوزت النمرة، التيليفون كايصوني، وكانساين يجاوب …
– آلو آلو، أمين ؟
– آلو، شكون معايا، العربي ؟
– وي أمين، كي دوزتي المواد اللولين ؟
– مزيان مزيان، واخا مشطون، ولكن لاباس. هدى معاك ؟
– هدى ؟ … آه كاينة معايا.
– دوزها ليا.
– لا راه ناعسة عيانة شوية… من بعد ونعاودو نعيطو ليك، يا الله زير راسك، الزردة إن شاء الله …
– يا الله، اووف، دابا عاد آندوز براحتي .. الحمد لله، شكرا ا لعربي …
– لا ….لا شكر على واجب …
وقطعت، ماقديتش نزيد كلمة وحدة، بديت كانبكي، مني سولني على هدى، ماعرفت مانجاوبو، وكذبت عليه..
وإن شاء الله ماغاديش نخون الوعد، وغايحتافلو بالنجاح ديالو، والعودة ديال هدى، واخا نعرف يكون الثمن هو الحياة ديالي، الثمن قليل باش نكفر على الذنوب والأخطاء ديالي.
المشاكل والهموم بحال لكماية والشراب، ولا حتى الصيام، ولاو كاجيوني بحال اللعب. الهم ديالي اكبر… الحمد لله، على الأقل بديت كانتبدل…
جلست فالطريطوار، حدا فين كنت واقف، وبديت كانفكر شنو ندير، شويا بدا كايصوني البوسط ديال التيليكارط .. آواه، من ايمتا، هاد العجب كايستقبل الاتصالات ؟ وحتى إذا كان كايستقبل، كيفاش بنادم عرف النمرة ديالو ؟
ميّكت عليه المرة الاولى، و \لكن عاود صونا من جديد، نضت بخطوات متثاقلة وهزيت لاباراي ..
ما جيت فين نجاوب، حتى تضربت فالقاع د راسي، مافقدتش الوعي، ولكن الجسم ديالي ثقال عليا، وكولش ولا كايبان فلو .
جاو شي 40 و لا 400 واحد، ماعرف شحال. وهزوني ودخلوني واحد السيارة كحلة. غمضو ليا عيني باش مانعرفش فين غادين بيا، وحيدو ليا كاع حوايجي، خلاوني غا بالكالسون، مشات الشريحة الإلكترونية، ومعاها المكانة لي عطاني جواد، حاولت نبقا محافظ على الوعي ديالي، لكن مش..مشيت ..
ما فقت إلا بواحد سطل ديال لما فوجهي، لقيت راسي مشدود لواحد الكرسي، والدنيا مظلمة بحال ايلا كاين فشي قبو، وهدى قدامي، مشدودة لكرسي تا هي، وواحد خينا تكون فيه شي قنطار ديال الطول، و2 ميترو ديال الوزن، آ ناري تخربقت ! شاد عليها فردي.
بداو كايضربوا فيا كوش ضروات ( ) … شويا جا الحاج … وسولني :

– فين الفيديو ؟ يصحابليك غا تهرب بيها ؟ ولا غاتسلك مني ؟
– فيديو ؟ إينا فيديو ؟
– نسيتي، الشباب ! عطيوه باش يتفكر !
– الضرب لا، انا ماعارفش علاش كادويوا، انا ماعارف والو على تا شي فيديو !

…

ناري آش هاد الفيديو تاني ؟

يتبع …

(القصة خيالية، كل تشابه في الأسماء أو الأحداث نابع من الزهر للي كايهرس الحجر، وشكرا.)

The post يوميات هربان في رمضان: |الحلقة 12| المواجهة 1 appeared first on Welovebuzz - عربية.

message N°11

– جواد: شوف آ السي لعربي، عندي اتفاق مع الشرطة باش يخففوا عليك العقوبة ويجيبو ليك محامي ولكن توصلهم للعصابة، را هادشي اللي قدرت ندير معاهم وبقيت أنا مكلف بيك، ولكن خرجتي عليا وعلى راسك. كنت كانتسنا لعصابة توصل ليك ماشي ندخلوا إنسانة اللي لا علاقة لها بهاذ الصداع كامل… ياك عييت نقوليك ما تبقاش فنفس البلاصة كثر من يوماين.

– لعربي: أنا ما بقيت مسوق لا للبوليس ولا للعصابة بغيت عا هدى ترجع لدارها بخير. أنا نستاهل الحبس ونستاهل تدير فيا العصابة ما بغات. شوف ليا كيفاش نعتقها، را عندي سلاح فيه قرطاسة وما بقيت خاسر والو فهاذ الدنيا.

– جواد: العصابة شادة هدى فواحد القنت حدا أصيلة، عندي ڭاع المعلومات اللي خاصك، نتا عاتمشي بوحدك وعاتصنت للتعليمات ديال العصابة وأنا وواحد من الفرقة ديال الشرطة عانتتبعوا خطواتك. وحيد عليك ذاك السلاح واش كاتصحاب راسك ففيلم؟ ماتزيدش عليك شي تهمة. اللي فيك يكفيك.
– لعربي: را قالوا ليا بلا شرطة.

– جواد: عادي نعطيك واحد الشريحة إلكترونية باش نتبعوا أثرك وعانعطيك التعليمات فواحد المكانة عاديرها فيديك ما عايعيق بيها حد.
لعربي وجد راسك للمواجهة…

يتبع ..

(القصة خيالية، كل تشابه في الأسماء أو الأحداث نابع من الزهر للي كايهرس الحجر، وشكرا.)

The post يوميات هربان في رمضان |الحلقة 11| الاستعداد للمواجهة appeared first on Welovebuzz - عربية.

message N° 10

رجعت للدار مع 1 ديال الصباح، لقيت أمين غارق فالدموع وجالس فالبلاصة اللي خليتو فيها.. الدار باقا مرونة مجاتنيش نمشي ونخليه فوسط ديك الحالة وهوا غادي يدوز الدورة الإستدراكية، مشيت هزيت حوايجي ودرتهوم فالصاك اللي فيه الفلوس وقلت لو جمع داكشي اللي غادي تحتاج والكتوبا المهمين فاش تراجع و يالاه معايا.. من طبيعة الحال مغاديش نديه معايا لطنجة مالي حمق؟ ديتو لواحد الفندق زوين ومافيه لاصداع لافريع الراس. حجزت ليه 10 أيام بينما رجعت وخليت ليه 3000درهم قلت لو يصرف بيها وإذا ماجيتش يرجع للدار، تمنيت لو حظ سعيد وواعدتو باللي ماغاديش نرجع تانجيب معايا هدى… شفت الدري مافهم والو فيا وماقال تاكلمة، شاف فيا بنظرة مفهمت فيها واااالو الحيرة وفقدان الثقة، ولكن را كولش عليا إذا ماجبتش ليه ختو ماكاينش علامن يعول، خصوصا أنها هي الوحيدة اللي كايتلخص فيها المعنى ديال الأسرة بالنسبة لو.

لمن فاتته الحلقة التاسعة: يوميات هربان في رمضان |الحلقة 9| رسالة هدى المشفرة

هاد المرة مكاينش الوقت باش ندير لوطوسطوب، مشيت نيشان فطاكسي للمحطة ديال التران، قطعت لطنجة فأول قطار خارج داك الصباح… كنت جيت شوي بكري تسنيت شي ساعة عاد باش تحركنا، بكثرة العيا وصيت الراجل اللي حدايا يفيقني مين نوصلو سيدي قاسم وانا نجبد علا باباها بواحد النعسة ماعقلتش على راسي حتى كانحس بالسيد تايقولي: فييق أولدي فيق، الموهيم نزلت و بدلت التران، جا فينا واحد ماكاين لا كليما وليطواليط فيهوم واحد الريحة تقيي، يا حسرة هادي الدرجة الأولى ديال القطارات ديال المغرب… كانو عندي شلّا مطارق فالراس، كل مرة وحدة كاتضرب، بقيت تانفكر كيفاش غادي يتلاقاني جواد و بإينا وجه غادي يشوف فيا ويقابلني من بعد الفعلة اللي دار معايا، كنت دايرو فواحد المكانة اللي صعيب يوصل ليها شي واحد، مكانش عندي شي صديق من غيرو ودارها قد راسو وخوا بيا، ولكن هاحنا غادي نتلاقاو وغادي نشوف شنو بلانو تا هوا.

وصلت لطنجة، مدينة مكانعرف عليها تا لعبة من غير متايحملوش الناس ديال الداخل وداك صور المعاكيز تما.. خرجت للشارع وخديت طاكسي قلت ليه يوصلني لشي سوق فيه التيليفونات وداك التخربيق، السيد قلعني من الهضرة ماشي من ولد لبلاد، قال لي: باينا فيك ماشي ولد لبلاد يالخاوا، مناين نتينا.. قلت لو كازاوي، السيد ناشط وباغي معامن يجبد الهضرة وانا عيان بالطريق وهاد الويلات اللي تابعيني. بقا تايهضر وانا سكت، تا ضرني فراسي، وانا نقولو سمحليا سيدي را والله تا عيان ومافيا مايهضر، طلق لينا شي ملحون لاكاين وخلينا نتصنطو لعظامنا. السيد ماعاودش الهضرة حتى وصلنا للبلاصة المعلومة، نزلت ومشيت لواحد المحال شريت كارطا بلا كونطرا أو واحد نوكيا عظم باش تالا لحتو مايبقاش فيا لحال واتصلت بجواد.

ألو جواد، أنا فطنجة دابا…جاوبني: شوف بلا ماطول فالهضرة منقدش نشوفك دابا نتلاقاو بعد الفطور بنصف ساعة قدام مسجد بدر، وهو يقطع. دابا خاص ندبر على فين نفطر، فين نرتاح، فين نبدل عليا هاد الحوايج الخانزين بريحت العرق وخاص نفكر كيفاش غاندير تانتفاهم مع العصابة ونفك هاد الجرة بخير. مشيت تخبيت بين شي شجر فواحد الحديقة وبدلت حوايجي، كان داك الكوان مبرد وانا نتكا فيه هو نيت… حتا جا عندي واحد الراجل مع ديك 6، السيد كبير وباينا فيه مزوج وبوليداتو. قاليا: أشريف، شعنداك؟ حالك معجبنيشي؟ جاوبتو، راه عاد كيوصلت من كازا وخص نرتاح باش نتلاقا وااحد السيد من بعد الفطور، سولني واش كاين فين نفطر وقلت لو لا ماعارف تاحاجة هنا فطنجة.. وعرض عليا داك الراجل، ترددت فالأول مافيا مايجبد الصداع على شي دار خرا عاوتاني، ولكن بالإلحاح ديالو والعيا اللي كان فيا ماكانش عندي شي خيار آخر. مشيت معاه.. السيد استقبلني مزيان وخلاني ندوش فدارو، شكرتو بزاف وقلت لو باللي خاصني نتلاقا داك السيد من بعد الفطور مباشرة، وقاليا خد راحتك… فديك اللحظة، تفكرت دوك الأحكام المسبقة اللي كاني عندي علا الناس ديال الشمال أنهم عنصريين، وبقا فيا الحال حيت تيقت شي حاجة لا أساس لها من الصحة، أصلا الناس حجر وطوب، فينما مشيتي كاين الخايب والمزيان.

وصلات وقيتة ديال الفطور،جلست مع أولادو اللي كانو 5 وفطرت مزيان، عاودت شكرتهوم واعتذرت إذا كنت ثقلت عليهوم باش نخرج فحالي. بغا السيد يوصلني ولكن مبغيتش نعذبو وفنفس الوقت مابغيتوش يعرفني فين وعندمن غادي. مشيت فالوقت عند جواد، وصلت وبقيت تانساين، هاد المسخوط تعطل… بديت نخاف لاتكون العصابة أولا البوليس شدوه تاهوا، موهيـــم بقيت تانفكر حتى جاليا من اللور، خويا العربي توحشتك، فينهوا الشعر والموسطاج، والله تاوليتي مبشور ياك ديما تانقوليك حيد ديك الشعكاك را كاتبينك بحال شي حمق.. جاوبتو: نيت أنا حمق اللي ثقت فيك ودرتك كثر من خويا، باراكا من الصباغة ويالاه نمشيو لشي قهوة عاود ليا أش كاين.

يتبع…

The post يوميات هربان في رمضان : الطريق إلى طنجة |الحلقة 10| appeared first on Welovebuzz - عربية.

message N°9

الورقة بين يدي، أرقام ومساحات فارغة، بغيت عا نفهم مالها ما كتباتش عادي، واش كانوا واقفين عليها؟ واش هادوا إحداثيات شي بلاصة  لا ميساج مخبي؟
أمين كايبكي مصدوم، وأنا خدام كانتفكر ذاك النهار فاش كانت كاتعاود ليا على الحسابيات والأعداد الأولية، آه بلاتي.. هادشي ما يكون عا شيفراش ديال سيزار هوا اللي ساهل ويمكن يدار بلا تفكير كبير خصوصاً لا شي حد مولف، ولكن خاصني المفتاح اللي هوا الرقم اللي كاتدار بيه الإزاحة ديال كل حرف، آجي دابا عاد فهمت لاش الارقام بين 1 و 26 هادشي مكتوب بالفرنسية ولا الانجليزية ولا ماعرت المهم صافي بدا كايبان ليا البلان.
خاصني نمشي نخرج للسيبير ندوي معا جواد، الليل كاينين سيبيرات اللي باقي كايديروا ليلة بيضاء، ومعا رمضان تبارك الله لكليان كاين. ولايني هاذ السيبيرات ولاو كاينقارضو…

دخلت تكونيكتيت فالسيت اللي كاندخل ليه ديما باش ندوي معاه، سيت مصاوبو على قبلي وڭاليا را مايقدر تا حد يعيق بيه. شرحت ليه البلان اللي طرا، صدمني ڭاليا راه عارف آش طرا ورا العصابة دات هدى لطنجة، وشرح ليا أنهم خطفوها حيث عرفوها مقطوعة من شجرة عندها عا خوها، إذن تا حد ما عايتبعها غيري أنا اللي ما قادرش نعيط للبوليس. وليت كانشك فجواد علاش ديما عارف آش طاري واش هوا معا العصابة ولا بوليسي ولا عا مصدع راسو؟؟؟ (أنا عارفوا كايقرا ميساجاتي ولكن ماشغليش) جعرت عليه وقلت ليه علاش كايلعب بيا، قاليا شوف سكت وجي دوز لطنجة، راه كايتسناني تماك وعطاني نمرة باش بعيط عليه فيها.
ذاك الوقت اللي بقا ليا فالسيبير دخلت فيه لواحد السيت على الكوداج بسيزار وترجمت النماري لحروف:

22 4 19, 22 17 8 12 25, 17 8
qh ylhqv sdv

ومن بعد جربت ڭاع المفاتيح الممكنة، را كاين عا 25 والسيت عطاني الحلول، وهنا فين لاحظت أن المفتاح 3 عطاني:

NE VIENS PAS

قلبي بقا كايضرب بالجهد.. لا مايمكنش، صافي موتة وحدة اللي كاينة، غادي ندي السلاح وعانمشي، اللهم نموت راجل ولا نتشد فالحبس.
عانمشي عند جواد هوا اللول، عادي نفاريها معاه، شحال وهوا مجرجرني..

يتبع ..

(القصة خيالية، كل تشابه في الأسماء أو الأحداث نابع من الزهر للي كايهرس الحجر، وشكرا.)

The post يوميات هربان في رمضان |الحلقة 9| رسالة هدى المشفرة appeared first on Welovebuzz - عربية.

لمن فاتته الحلقة السابعة: يوميات هربان في رمضان: مراكش |الحلقة 7|
ولكن فرحتي أنا كانت اكبر وأفضل، كاندوز النهار ديالي تقريبا كامل كانقري ونراجع مع أمين، ما بين فيزياء وماط، شوية د الفلسفة، قبل مانقلبوها كارطة وضحك باش نرتاحو، وفوق هادشي كامل، الراحة ديال بالصح هي الشوفة ديال هدى.
شحال تفرجت بالزز مني فالأفلام الميكسيكية والتركية مني الواليدة كاتقلب دوزيم، وكانبقا نشوف داكشي د الحب والغرام، والزعطة ونبدا نغوت ونغمغم، آش هاد التخربيق، ساعة صدقوا ماكايكذبوش، إيلا كاينة شي زعطة فهاد العالم، ولا شي طيحة مزيانة، فأنا طا ا ا يح، وسبابي هاد البنت.
« وا هيا ناري، واش هادا وقت الحب والهيام، ماحد دجاجتك آ العربي تقاقي وهي تزيد فالبيض، وا نتا مجرم وهربان وباغي تزيدها بمصايب الحب تا هوما ؟ » .. واحد الصوت فراسي ديما كايدير ليا هاد المحاضرة، ولكن كانطفي والديه وكانبقا نتخيل راسي كون كنت فحالة اخرى، احسن من لي أنا فيها، واش كنت نقدر.
كانحبس هاد التفكير، وكانكمل داكشي لي كاندير فيه. آش غانحبس آش، را كانبغيها، مايمكنش، آو، داكشي بالزربة. المذاق د الطياب ديالها نساني فماكلة الواليدة، الشوفة ديالها … بدون تعليق، صوتها …
وليت كاندوز النهار كامل وأنا كانساين فوقتاش هدى ترجع من الخدمة، كانبقا معاها، نهضر معاها، بكل احترام، حتى إيلا ماكنتش أنا راجل مزيان، فعلى الأقل، مانخونش الثقة لي دار فيا أمين. وخرجنا أنا وأمين وهدى، تهلاو فيا وساراوني المدينة. آيه ! راه حسنت باركو ليا (واش لي تقوليه هدى حسن يقدر يقوليها لا ؟ هه)، وليت قاد نخرج، واخا ماشي بكل أرياحية، ولكن على الأقل، بواحد القدرة على التسركل (اعذروا العربية على قد الحال).
ما بقاش بزاف على الاستدراكية، أمين عقلو خفيف، وقربنا نساليو كولشي، باقا ليه غي مراجعة بسيطة ونكونو مساليين. أمين كان مخلوع بزاف، والضغط لي كان عليه كان خالعني لا يمشي يخرج عليه فالامتحان، فقررت نسافرو أنا وياه، صحيح غادي نغامر، ولكن إيلا كانت هاد المغامرة غادي تكفر على واخا جزء من الأخطاء لي درت، فأنا مستعد أتم الاستعداد. طرحت الفكرة على أمين وقررنا بلعشية نمشيو لكازا، حيت عمرو شافها.
فلعشية، عيطنا لهدى وقلنا ليها شكاين وماعارضاتش الفكرة، مشينا للمحطة، قلبنا على الكار وركبنا. فالطريق أمين كان عيان ونعس، ولكن أنا بقيت غادي، عيني من الشرجم كاطل على الطريق، وكانسول راسي، فين غادي بحياتي … واش مازال مايتنقذ ؟ واش واحد بحالي، سكير وكماي، وغشاش، ومجرم، وفار من العدالة و و و … يمكن يفكر تا هو فنهار يدير دار ويستقر ؟ بديت كانشوف منين جيت وكيفاش بديت، وفين أنا دابا، واش إيلا شافني داك الشاب لي واحد النهار كان كياحلم بعيد، واش آيكون فرحان بهادشي لي ولى فيه العربي؟ طبعا لا . فاق أمين، شاف فيا وأنا نبتسم، وحتى هو. يمكن هو ابتسم بدون سبب، ولكن أنا ابتسمت، حيت قدامي كانشوف، يمكن، الشخص لي سبب فإنقاذ الحية ديالي من الضياع لي هي فيه.
وصلنا لكازا، مشينا أنا وأمين لواحد السناك، كلينا، شحال توحشت الواليدة، وبغيت نشوفها ولكن مايمكنش، أنا وليت خطر عليها. المهم، تسارينا أنا وأمين ودوزنا وقت زوين، الدري نشيط وعامر حيوية، ومعاه كانحس براسي حي من جديد وعايش. مانعسناش، الليل كامل وحنا مابين المدينة لقديمة، وجامع الحسن الثاني … حتى سالينا فعين الذياب وبقينا جالسين كانساينو تطلع الشمس باش نرجعو فحالنا لمراكش. صحيح دوزنا غا ليلة وحدة، ولكن كانت بقيمة أيام كثيرة. وفيها رجع الشاب الطموح النشيط اللي لداخل عندي للحياة.
مشينا لمحطة د التران هاد المرة، لقينا التران اللول مازال ليه الحال، بقينا كانساينو كي شي حماق، وركبنا. شدينا واحد الكومبارتيمون غا بجوجنا حيت التران كان خاوي ونعسنا بحال شي دراري صغار، ما فيقنا غير الكونترولور على ود الوراق. كنا فابن جرير أصلا.
ساعة من بعد كنا فمراكش، ولات هاد المدينة فوقت وجيز بحال بلادي. يمكن حيت هنا تولدت من جديد، تولدت كإنسان عندو طموح، ويمكن غا حيت هنا كاينة هدى والسلام. البغو ومايدير آ خوتي.
قلبنا على طاكسي تا عيينا، كولشي باغي يوصل لكوار، حيت لمغاربة ما معاهومش اللعاقة بالزاف، درنا بناقص وضربناها كعبية حتى للدار. ماحسيناش بالطريق، ضاحكين، ناشطين … مني وصلنا، أمين جبد الساروت يالله خشاه باش يحل، هو يتدفع الباب. آو ؟ هدى خلات الباب محلول زعما ؟ آولا مازال مامشات للخدمة ؟
دخلنا لقينا الدار كلها مقلوبة وكولشي مشتت ..
أمين : كيفاش زعما، شي واحد جا يسرق ؟ … هدى ! هدى !
لا جواب، بدينا كانتخلعوا، جبد أمين التيلفون باش يعيط ليها، ولكن سمعنا السونيط ديال التيليفون فالدار، مايمكنش، هدى عمرها ماكاتخرج بلا تيليفون.
بديت كانفكر فالاسوأ، ياكما … ؟
شفت لتحت، لقيت واحد الورقة مقطعة من شي دفتر، ومكتوب فيها أرقام.
ماعقلتش على راسي شفت هاد الأرقام، جا عندي أمين، وشاف فالورقة:
– هاد الخط ديال هدى، مايمكنش نغلط، حياتي كاملة هي لي قراتني الرياضيات، ومايمكنش ننسى كيفاش كاتكتب كل رقم من الأرقام .
ايلا هي لي كتبات هادشي، وهي ماكايناش هنا ؟ زعما هذا يكون شي ميساج ؟ وعلاش آ تخلي لينا ميساج بلكود ؟
حاولت مانبينش الصدمة فوجهي، وحاولت نواسي راسي ونواسي أمين. ديك النهار كانت هضرات ليا على الحب ديالها لهاد المجال ديال الكوداج، وبلي كاتقرا بزاف على أنواع الاتصال بالقن، وداكشي ديال الجواسيس، إذن هادو ماشي مجرد أرقام عشوائية، ولكن رسالة. ولكن علاش ماتكتبش الرسالة مقادة ؟ إذن ماكانتش بوحدها، ولو كان شي حد آخر شافها كتبات شي حاجة من غير أرقام فالورقة كانو آيقطعوها، إذن … زعما … هدى تخطفات ؟؟؟؟؟؟

حاولت نبعد هاد الفكرة من راسي، وأنا فخضم هاد النزاع داخل العقل ديالي، صونا التيليفون د هدى، طرنا عليه أنا وأمين، جاوب هو، شوية مد ليا التيليفون وقال ليا، الاتصال ليك نتا … يديا بداو يترعدو، ناري ميمتي لا. شديت التيليفون، وحاولت نهضر وأنا واثق : آلو
– هاها، ولدي العربي، يصحابليك كاين فين تهرب منا ؟ نتا ديالنا، عارفين عليك كولشي ولكن خليناك تحس براسك شوية.
– شكون معايا ؟؟؟؟
– ماكايهمش. شوف بغيتي هدى، أتجي عدنا برجليك. وإلا، فنسى بلي كاين شي حد سميتو هدى. آ نقولو ليك فين تجي من دابا سيمانة. تيط تيط
– آلو ! آلو ! آلو !
– نمشي عندهوم، آ يقتلوني !
وهانا درت كاع داكشي لي بغاو، ماكاينا تا حاجة كاتضمن بلي هدى آتبقا على قيد الحياة. شديت الورقة لي كتبات هدى وبديت كانشوف فيها. الأمل، كل الأمل هو نلقى الحل ديال هاد الأرقام.

حسيت بواحد الغضب كبير، فهاد المرة، ماغاديش نخدل الناس لي معولين عليا، شحال من مرة خنت الوعد، وأخفقت فتحقيق داكشي لي ناس كايتسناو مني. لكن ماشي هاد المرة …
يتبع …

The post يوميات هربان في رمضان: |الحلقة 8| appeared first on Welovebuzz - عربية.

message N° 7

The post يوميات هربان في رمضان: مراكش |الحلقة 7| appeared first on Welovebuzz - عربية.

message N°6

أنا شاب مولع بالتكنولوجيا والأرقام من كنت صغير، عصامي وتعلمت عا بالقراية والسيبير فالتسعينات كيفاش نفك مشاكل صعبة كاتخلط بين الماث والريزو. واحد العام جاب ليا العربي كتاب على « ألان تورينج » وقاليا را عايعجبك واحد الدومين سميتو الكريبطوغرافي.
هذاك الكتاب غير ليا حياتي وبقيت مدين للعربي واخا كان راجل مامزيانش ومبلي.
تعمقت بوحدي فالكريبطو وتعلمت بزاف ديال لغات البروچراماسيون، تا طلع ليا النيفو بالجهد ووليت كان صاوب ريزوات سيكوريزي مزيان وصعبة الاختراق، ولكن حيث كنت برهوش بغيت تانا نبدا نهاكي فالسيتات ديال عباد الله، كان سيت مورا سيت كايتحطم حدا التقنيات دياولي، تا لواحد النهار فين طاحت عليا واحد الفكرة خطيرة: نبدل النقطة ديالي ديال الجهوي، حيث ماكانش عندي معا المواد الأدبية باش نضمن الأقسام التحضيرية.

دوزت شهرين وأنا كاندرس السيت وكيفاش نقدر نزرب على شي حد كايدخل النقاط ولا ندخل « لا باز دودوني » نيت، الناس ديك الساعة كانوا كايوجدوا للباك وأنا ضارب الباك بركلة عارف راسي نجيبوا عا بالضحك. تالواحد الليلة وأنا كانشرب واحد الكويس ديال آتاي مليح، لقيت واحد الثغرة باسلة واخترقت السيستيم، شحال ضحكت ذاك النهار.. تهليت فراسي فالعربية والتربية الإسلامية وزدت نقيطة فالاجتماعيات.
هاذيك النقيطة اللي فهمت من بعد أنها خرجات عليا.
كان عندهم فاللوجيسيل واحد البلاصة كاتقيد تاريخ التغييرات، وشي واحد شاف داكشي تزاد فخطرة ومشا قلب على الورقة ولقا داكشي غالط. القضية دخلات فيها الشرطة العلمية وكلفوا واحد المجموعة رقمها سري، باش مانبقاش نعاودها نسميها ليكم « المجموعة ثمانيتون »، هاذ المجموعة فيها المخاخ ديال المغرب فالانفورماتيك، حيث الباك ملي كايتلعب بيه كايخلوض دولة على قدها. لقاوني بسهولة وأصلاً أنا مول الورقة، وهنا فين صافي سالا مستقبلي وما بقا عندي مخرج، وهوما حيث ما خلاو ليا والو بززوا عليا نخدم معاهم ولا الحبس.
هانتوما فهمتوا لاش عارف كلشي على البوليس وعلى عصابة المخدرات ومسكين لعربي ماعارف والو.
كون بغات المجموعة ثمانيتون تشد العربي كون شداتو من نهار بات عند الحسين، كان طالع ليهم الدم حيث شحال وهوما حاضين الناس ديال تسريبات فالفايسبوك ولكن خرج ليهم لعربي من الجنب.

فالوقت اللي عايكون وصلكم فيه الميساج عانكون مشيت من سباتة 04 حيث كانبدل الموقع تاعي كل سيمانة، ولفت شارع الشجر واخا فيه الصداع  شابع مضاربات فرمضان. أصلاً صعيب تلقا شي واحد لا كان مخبي فالدروبا المغبرين ديال سباتة وعاد ماكانستعملش الريزو الزين ديال تم، كاندوز بتقنياتي الخاصة للانترنت وكانستعمل « طور » باش ما يتتبع حد التحركات تاعي.

علاش لعربي باقي مطلوق؟
حيث أنا اللي قلت ليهم را عايجيب ليكم بارون المخدرات على رجليه (وحيث ما نسمحش ليهم يحطموا الحياة ديال لعربي).
دابا أنا اللي مكلف بالعربي وواحل فيه..
العصابة را عارفاه فمراكش..

يتبع ..

(القصة خيالية، كل تشابه في الأسماء أو الأحداث نابع من الزهر للي كايهرس الحجر، وشكرا.)

The post يوميات هربان في رمضان: سباتة 04 |الحلقة 6| appeared first on Welovebuzz - عربية.

 message N°5

شكونا أنا ؟ مابقيتش عارف راسي، فين هو العربي لي كان فصغرو كايقرا وكايثقف، وكايحلم شي نهار يولي رئيس حكومة، ماشي حيث بغا اللعاقة ولكن حيث باغي يصلح البلاد، حيث باغي يعاون الناس ويكون قدوة .. أين أنا من كل هذا ؟؟
الدمعة هبطات ليا على خذي بلا ما نحس، مابقيتش كانعرف راسي، تبدلت بزاف، ووليت تماما العكس ديال داكشي لي كنت كانحلم بيه. كنت باغي نكون قدوة، نعلم الناس كيفاش يكونو معقولين، صدقت أنا هو أكبر غشاش، كنت باغي نعلم الناس مايطيحوش فعالم الإجرام ونحفظ للناس حياتهم وأمانهم، ولكن .. أنا وليت مجرم، ماعرفتش تا نعلم راسي، كنت باغي نثقف الناس ونوعيهوم، صدقت وليت أستاذ غا طانز على التلاميذ ف المدرسة العمومية، وكانخدم غا مع الناس لي كايخلصوا… الحاصول أنا فاشل …
بقيت غادي من زنقة لزنقة فمراكش، الصهد والشمس طيبو ليا راسي، وكانحس بلي ف أي لحظة نقدر نطيح، الدنيا بسالت فعيني ومابقى ليها تا معنى. بقيت كانتمشى، كانقطع الطريق بلا مانشوف وحاني راسي وسخفان، ورمضان مللفوق، تقطعت، شحفت، وجعت … لكلاكسون ديال طوموبيلات كايقول ليا نحيد من الطريق و أنا بلا جهد، السبان والمعيور من بنادم لي سايق سمعت منو الكثير، ولكن، ماعندي لا جهد لا وجه باش نجاوب، فالاخير، لو كان عرفوني ش داير كانو يديرو كثر من هاكا ….. « وأنا كانستاهل ».
جلست تحت واحد الشجرة وبقيت كانبكي، الحمل تقال عليا، وخليت الدموع يفاجيو عليا، لو كان بإمكاني نرجع اللور، نصلح ما درت، نبدل راسي .. لكن هذا ضرب من المستحيل.
مني هبطني الطاكسي فالمحطة وأنا كانتمشي دون هدف محدد، ماعرفتش راسي فين كاين. سرحت ف البكا ديالي، ومع كل دمعة كانحس بلي الحمل ماكايخفافش، ولكن الغصة ف قلبي كتهوان، ماكرهتش نغرق ف دموعي ومانعيش، ماكرهتش نموت، نهني راسي، عائلتي وبلادي مني، أنا غير ثقل زايد على هاد الارض.
التيليفون كايصوني، فيقني من القلبة، بقيت كانقلب عليه فالصاك بهيستيريا، جبدتو وجاوبت :
– آلو جواد ؟
– وي العربي، شوف مايمكنش نطول معاك فالهدرة بزاف، لبوليس عارفين كولشي، مايمكنش نجي عندك، ولا نشوفك، أكثر حاجة نقد ندير هي نهدر معاك فتيليفون، أنا آنعيط ليك من بعد، هرب ! هرب ! تيط، تيط…
– جواد ؟ جواد ؟ جوا ا د !!؟
بدا الجسم ديالي كايترعد، الأمل ديالي الأخير مشى ؟ ضاع ؟ حتى جواد، الوحيد لي كنت عارفوا يقد يعاوني مابقاش قاد يساعدني. رجلي فشلو، وطحت تحت الشجرة من جديد، وبقيت كانبكي عاوتاني، بكا ديال شي دري صغير تلف على واليديه، بكا ديال أم مكلومة مات ليها ولدها بين يديها، بكا ديال أب مظلوم كايشوف ولادو معذبين ويديه مغلومة، بكا ديال … راجل حياتو ضاعت وما ليه غير يعيش هربان حتى يطالو النسيان أو يتشد ويتفرض عليه عالم النسيان.

مدة وأنا ف ديك الحالة، بين بكا ونواح، حالتي حالة ودموعي سيالة … تمنيت الوقت يوقف وتنشق الأرض وتسرطني. الناس كايدوزو من حدايا وتا واحد مامسوق، كايشوفوني على أساس أنا مجرد حثالة، وإيلا جيتي تشوف، إلى حد ما، را عندهوم الحق.
بقا الحال على ما هو عليه مدة ماشي قصيرة، قبل مانسمع واحد الصوت كايقول : »خويا، خويا، واش لاباس ؟ »
ضرت نشوف شكون كايهضر، كانلقاه واحد الشاب، ماغايكونش واصل العشرينات، تماما فعمر الشباب لي كانقريهوم، حسيت بالندم كايغمرني من جديد، وأنا كانتفكر شحال ديال الشباب ضيعت ليهوم حياتهوم بالغرور والطيش ديالي، وفاللخر أوّل واحد كايتسوق ليا، ما هو إلا شاب بحالهوم. مدّ ليا يديه ووقفني على رجلي، ما عافش جلدي الموسخ، ولا ريحتي الخانزة، بالعكس كان كايهدر معايا بكل احترام والابتسامة على وجهو.
لأول مرة كانبتاسم من نيتي، بغيت نعنق الدري، نطلب منو السماح على كاع داكشي لي درت للشباب بحالو، لكن أنا موسخ، بلا مانزبلها…
– يالله معايا، دوش وغسل عليك هاد الحالة، عندك فين تبات ؟
– … آه، لا لا، ماعندي والو فمراكش.
– ألوغ، دارنا ديرها داركوم، تجي تفطر معانا، ونتا ضيف الله.
– ولكن ..
– ما كاين ما ولكن، مرحبا بيك.
الدري شير لطاكسي، ركبنا ومشينا. فالطريق بقيت كانفكر، واش هاد الدري من نيتو آيدخل مجرم لدارو، ومجرتل من لفوق، بقيت مبهوض، واش باقي هاد النوع د البشر كاين فالبلاد ؟ ولكن حق من قال، إنما الخير في الشباب …
وصلنا، هبطنا، حل الدري لباب ودخلنا، الدار ماكانتش كبيرة، ولكن الديكور فيها كان رائع، كل حاجة فمكان مقاد ومختار بعناية … مشا دري واحد اللحظة وخلاني جالس فالصالون، رجع بالزربة وعطاني حوايج نلبسهوم، وفوطة ونعت ليا طريق الحمام ف الدار. نضت ومشيت كيما قال ليا، شوية وأنا نتفكر، قلت ليه:
– بعدا، شنو سميتك ؟
– أنا ؟ أمين، و تا ؟
– سميتي، حميد .. ( آنزيد لكذوب تا هو ؟ ) لا، العربي، العربي، ماديش عليا راه شمس هه.
– مشرفين السي العربي.
ابتسمت ليه ومشيت ندوش. واحد الراحة ماحسيتش بيها من مدة، توحشت الدوش والدار .. لبست حوايجي، فاش كنت خارج، غادي لجهة صالون كاتبان ليا من بعيد فالكوزينة واحد البنت، بقيت واقف كانشوف فيها وهي خدامة، آية فالجمال، سهيت فيها. جمعت الوقفة، ومشيت جلست فالصالون. وبلا مانحس نعست .. جا أمين وشعل التلفزة وجلس حدايا، وجبد الشكارة ديالو، وأنا نفيق، سولتو :
– ياك سالات لقرايا ؟
– الناس سالاو، أنا عندي الباك وجبت راطراباج، ويا ربي تعاوني باش نجيب هاد الباك نفرح ختي، هي اللي عندي من بعد ما ماتوا واليدينا …
تمّا، وفديك اللحظة بالضبط حسيت ب راسي كانصلاح لشي حاجة، إحساس ماشعرتش بيه منذ زمان…

يتبع…

The post يوميات هربان في رمضان: مراكش |الحلقة 5| appeared first on Welovebuzz - عربية.