سلسلة رمضان : يوميات راضية (الحلقة 3)

إيوا فين بقينا الجمعة الفايتة، أصحابي وصحاباتي بقينا فاش مشيت نجيب لما لجدة وتلفت عليها إيوا تما صافي أنا فاش تقاضاو ليا ومابقا قدامي إلا حل واحد وهو نعيط للواليدة هي ليكاتعرف كاع البلايص لي فالسويقة وحسن مني فهادشي واخا هاناكل عليها سلخة، ولكن جدة يهون عليها كلشي.

أنا هي جبدت التلفون نعيط ويد تحطات فوق كتفي وسمعت راااااااضية، تخلعت واحد اليد كبيرة ولكن قبل ماندور حسيت بيها يد مألوفة عندي وحنينة واخا نزلات عليا كي الخباطة… ااااااااااااااااااااااه باااااااااااااااااااااابا، ماتشوفوش شحال فرحت ديك الساعات جابو الله ونزلو ليا من السما كي الملاك، درت عندو وعنقتو وبديت نبكي، كلشي تجمع عليا الفرحة والخوف وكلشي، وهو يشدني قاليا ويلي راضية مالكي ا بنتي عمري شفتك فهاد الحالة وانا نعاود ليه كلشي. قالي صافي هادشي علاش كاتبكي واعرفتو شكون، راه الواليدة ديما كانت كاتمشي عندو ومن زمان أجي أجي معايا أنا نديك راه أبنتي هي مع الظلام تلف عليك ولكن بشرط واحد، قلت ليه أما هو وبديت نمسح دموعي حيت حسيت صافي المشكل تحل، قاليا ماماك أبنتي غاديا طلبي منها السماحة هي كاتقسح معاك ولكن راه واخا هاكاك راه ما تهونيش عليها، قلتليه أبابا واهيا ديما قاسحة معايا أنا عارفة راسي ديما طايحة فالمشاكيل ولكن دابا نكبر ونعجبك، بقا بابا كايضحك، قاليا موحاااااااال واش نشوف داك النهار هههههههههه نتي يا الحميقة بنتي وحبيبتي لا نتي ولا رحاب بجوج بيكم واخا تكبرو هاتبقاو الصغيورات ديالنا، ويالاه باراكا من البكاء وزيدي نشريو لجداك الماء تلقاها شحفات هههههههه.

إيوا صافي مشنا لقيت جدة مامسوقاش ليا نهائيا هههههههههه مجمعة ومامسوقاش ليا وهي دور وتقول ليا وا ااااااري داك الماء على سلامتنا وباباك حتى هو هنا، ويلي فين كنتو بجوج. جاوبناها دقة وحدة : « قصة طويلة أ الحاجة » وبدينا نضحكو ههههههههههه.

المهم رجعنا للدار ومنين قربنا نعسو كلشي مشا لبيتو وانا خرجت للكوزينة نجيب لما لقيت ماما واقفة حتا هي كاتعمر فالما، وانا نستغل الفرصة وعنقتها وقلت ليها سمحي لي، قالتلي مالكي دابا، قلتليها سمحي ليا على الحماق ديالي والمشاكل ليكانطيحك فيها وانت دابا ماكاتهدريش معايا ولكن انا مانقدش نشوفك مقلقة عليا، نتي باغاني فحال جميع البنات، نكون مثالية ولكن ربي خلق كل واحد والطباع ديالو كيف ما أنا فيا شي حوايج بنت وحدة اخرى ما تلقايهومش فيا وهي تجرني قالتلي وشناهما بالسلامة : قلت ليها مثلا أنا كانحماق عليك واخا مقسحة معايا ديما، وهي ترد عليا : وا الهبيلة انا كاندير هادشي لمصلاحنك وباغاك طلعي بنت مرزنة ومتبتة ومحصنة، ولكن ا بنتي هادشي ماكامنعش اني كانبغيك راكي بنتي وكبدتي وكاين شي حد كايسخا بالكبدة، وانا نبدا نبكي بالفرحة فلت ليها بصح ؟  وهي تجي رحاب : هههههههههههههاي هههههههههههههاي كاتعانقو بلا بيا انا جايا خليو ليا بلاصة، وجات كاتجري وعنقاتنا حتا هي، وهي دور عندي ماما (واهاد المرة كانقول ليها ماما حيت حنينة معايا هههههههه) إيوا وهي تشدني من حناكي وباستني وباست رحاب حتى هي وهي تقول لينا نتوما بناتي واخا نقسح معاكم عمري ما نفرط فيكم.

النهاية.

للأسف ماكاينش هاد المرة داك الجملة (ترقبوا الحلقة القادمة …) وماسخيتش بيكم وماتنساوش راضية  الحماق ديالها، وعيد سعيد يدخل عليكم بالصحة والعافية (ويلي ويلي على راضية والصوابات ههههههههه).

The post سلسلة رمضان : يوميات راضية (الحلقة 4 والأخيرة) appeared first on Welovebuzz - عربية.

سلسلة رمضان : يوميات راضية (الحلقة 2)

راكم باقيين عاقلين على شنو وقع المرة الفايتة وكيفاش وحلتها للسيدة وكانت هاتموت، ما تخافوش هاداك هي فشوش، السيدة لاباس عليها (وا بيني وبينكم شوية ماكانت هاتجيف وتموت فيها ههههههه، ولكن ربي حفظ هاد المرة).

الواليدة قلبات عليا صافي، زعما تخاصمنا وعاقباتني، والواليد كايصلح الخواطر ويقول ليها واصافي راه رمضان هذا والعواشر والبنت باقا صغيرة هاسمحي ليها. أما داك السفريطة ديال رحاب عاد ماكاتشعل العوافي وتقول ليها ويلييييييييييييييي يا ماما وراه السيدة كان على شوية وتموت لينا هنايا، وأنا هي ساكتة وكانتحلف فيها نشدها بين يديا داك البرهوشة نعلقها فالحيط، هي بلاتي.

المهم دازت صيمانة ما كاين هي السلام بيني وبين الواليدة، حتى واحد الصباح فيقاتني باش نوض نعاونها فالدار، حتى شوية كانسمعو السونيط فالباب، جينا نشوفو شكون جا : لقيناها جدة هنية، وهااااااااااد جدة هنية راه وتقولوووووووووووووو واش كاتفاهم مع الواليدة، هادي راها الأم ديال بابا والدفاع الوطني ديالي. الواليدة تبغي تغوت وهي دور فيها جدة هنية، والله ماتعاود دور حدايا، المهم أنا كاندير ليبغيت فالحضور ديالها وهادشي ليكايزيد يحمقني فيها.

زدت فرحت منين قالت لينا جدة هادوز معانا 3 أيام ديال رمضان، وقلت الله هادي فرصة نتفشش شوية وندير ليبغييييت ساعات شكون خلاك، هاديك الجبهة المعارضة ديال رحاب كاتمشي توصل لماما كلشي، وبالطبع هي بالدور ديالها كاتقيد عليا هي تمشي جدة ويبداو القنابل الصروخية.

اليوماين الأولى دازو بيخير وعلى خير، حتى للنهار الثالث ديال رمضان. فطرنا وسالينا وبدينا نتفرجو فواحد المسلسل راه عزيز على جدة سميتو « سر المرجان » كايدوز ف 2M، إيوا قاتلك جدة كاتفرج فيه حيت هاداك البطل ليسميتو الحبيب كايفكرها فجدي الله يرحمه وكاتفكر ياماتها معاه، إوا حررررررررررررررر بشششششششششششش شي حد يتكلم والمسلسل دايز وهي كايبدا الحبيب يهدر جدة كاتبدا تعاود المغامرات ديالها مع الحبيب ديالها هههههههه… ماكانعرفو واش نتبعو قصتها ولا القصة ديال المسلسل. ما علينا، حنا صابرين ونفس القصة كاتعاود كل نهار ولكن أش هانديرو مكتاب الله نسمعوها، وتعاويد الناس الكبار خاصهم الخاطر (ويلي ويلي على راضية دارت العقولات وبدات كاتهدر كيف الناس الكبار ههههه).

المهم أسيادنا سالا المسلسل وهي دور عندي قاتلي أبنيتي أراضية زيدي نخرجو مورا التراويح نسرحو رجيلاتنا شوية فالمدينة، قلتليها واخا على راسي وعينيا ما ربما نلقاو ليك شي الحبيب جديد ههههههه. إيوا وهي تجرني من شعكاكتي وقالتلي وا نوضي تلبسي وزيدي قدامي، راه جدك منو واحد وماكايتعوضش و… ويالله بغات تبدا القصة من جديد قلت ليها : صافي والله هادي والتوبة أنا نايضة نلبس ونخرجو، ومالي أنا مسكينة على هاد الزهر ليبنت ليه فالبلان كايجرني من شعكاكتي، يالاه أنا غادية جوج دقايق وانا معاك.

رحاب بغات تجي معانا، قالت ليها جدة ألا أبنتي ماتخليش ماماك وحدها حنا نخرجو دغيا نجيو، واناري شحال فرحت السفريطة ماهاضيقنيش حتا فهادي.

إيوا هي هاديك، لبسنا وخرجنا وشوية وصلنا للسويقة وقفنا عند واحد مول الجلالب عجبو جدة، إيوا مول الحانوت رحب بيها وجاب ليها كرسي فين تكلس وهي تقولي جدة عافا بنتي سيري جيبي ليا شي قرعة ديال الما راه الحانوت قدامك وأجي.

أنا ماعرفتش باش تبليت، مشيت عند حانوت أخر إيوا باش بغيت نرجع تلفت، الظلام كايبان ليا والدنيا عامرة ومالقيت جهد، بقيت واقفة فبلاصتي وبديت ندمع تخلط عليا كلشي ومابقا قدامي هي حل واحد، نعيط للواليدة تجي تفكنا هي عارفة المدينة شبر شبر، أنا يالاه جبدت التلفون وحسيت بيد تحطات على كتفي وسمعت : رااااااااضية…

ترقبوا  التتمة والحلقة الرابعة والمقبلة يوم الجمعة على نفس الموعد.

The post سلسلة رمضان : يوميات راضية (الحلقة 3) appeared first on Welovebuzz - عربية.

رااااااااااااااااااااااااااااااااااااااااااااااااااااااااااضييييييييييييييييييييييييييييييييييية

سلسلة رمضان : يوميات راضية (الحلقة 1)

صافي أنا تخلعت وتزعزعت ما بقيت عارفة أش ندير واراسي ماهزيتوش من الأرض، كايبان لي هي الوالدة غاديا تخبطني حتى طلعني عند سيدي ربي. أنا كان كايبان ليا حل واحد : بيناتنا أ البنات، زعما عمركم ما درتوها ؟ وها قولو راه بيناتنا ماكاين تخبية..

الحل أسيادنا كان هو ندير راسي سخفت ولكن معامن طحت، لالاهم خدوج كاطيرها مع الطيور راه تشمشمها، ولكن والله ماكان شي حل قدامي باش نهني راسي من الغوات واخا هو تابعني منين هانفيق.

جدة مسكينة ماخلات حد يقرب ليا عيطات للواليد وهزوني لبيتها ونعساتني وبدات ترش عليا الما، وبيناتنا وا جدة عارفة أش كاين عارفاني هي مطلعاها عليهم ولكن كاتلعب الدور، راه جدة هاديك، الحنان والطيبوبة.

المهم الواليدة ماقدت تقول والو، هي ساكتة وبينها وبين راسها كاتحلف فيا، ماشي حيت هي زلايف وصافي حيت هادوك الزلايف شراتهم الوالدة لجدة نهار أول مرة خدمات وها علاش القيمة ديالهم كبيرة عندها، ومن واحد الناحية حتى أنا بقات فيا ولكن هادشي ليعطا الله.

المهم أنا باقا مكملة فالتمثيلية، شوية صافي حليت عيني ودرت راسي فيا الدوخة، واحد الشوية ودن وجدة مسكينة جابت ليا الفطور حتى لعندي وهيا تقول لي : « هاد التنوعير سيري ديريه على شي حد أخر أراضية، ولكن جيتيني ليوما كلشي مجموع ما بغيتهاش تشوهك قدام العائلة كاملة. يالاه واكولي ونوضي أجي معايا نجلسو وماتبقايش بوحدك. » المهم بست يدين جدة هي ليديما عاتقاتني ونضت واخا هاكاك طلبت السماحة من الواليدة واخا هي ماباغاش تسامح، أنا المهم طلبت المسامحة وجلست مع كلشي.

هاد النهار داز والواليدة مازال حالفة، ولكن هي مخليا دكشي للوقت المناسب وتنزل عليا كيف الصاعقة بحال ديما، أصلا أنا ولفتها هههههه.

دازت الصيمانة الأولى ديال رمضان عادية جدا، روتين كايتبع روتين، حتى للنهار لي الواليدة تلقات بواحد صاحبتها من أيام الدراسة وحتى راجلها صاحب الواليد، إوا قالت ليها راه جينا سكنا هي فالزنقة ليحداكم ويالاه ليوما كيف راحلين، إوا أنا ربي عطاني الواليدة مصوابة وبزااااااااااااااياااااااف، قالت ليها والو أ الحبيبة والله فطورك اليوما عندي ونيت جيبي الدراري يلعبو معا البنات ويدوزو هاد النهار مجموعين راه فالتاقيدة ديال ولدك أمين وياسين. إيوا صاحبتها جاتها من الجنة والناس قبلات بدون تردد، وشكون كرهات دير رجل على رجل ما يتبعها لا ماعن لا والو.

العشية صافي بداو التحضيرات والواليدة قالت ليا والو أراضية نتي ماتعتبيش على الكوزينة عارفاك منحوسة ومافينا ليتحشم مع الناس، ورحاب هي ليهاتعاونها. وا عشنا وشفنا السفريطة ديال رحاب ليصغر مني هاتحزم وترزم ودخل للكوزينة، وأنا نقول ليها والو أنا الكبيرة والله حتى ندخل ندير شي حاجة حتى أنا باغا نتعلم. وهي تشوف فيا مزيان وقالت لي يالاه ديري داك الدزارة وجلسي فالطبلة ونقي اللي عطيتو ليك وحسك نشوف يدك وصلت للطنجرة ولا شي حاجة، وا بغيتي تعلمي يالاه بداي بدكشي الصغير، نقي على قلبك راه كاملين بدينا هاكا.

وباش تعرفوني عزيزة بزاف على الواليدة، عطاتني البصلة هي لينبدا بها والدموع بداو ينزلو تقول كانتفرج فمسلسل تركي والبطل كايموت قدامي وخلاص، المهم رضيت بأمر الواقع وبديت نقي ونبكي والدموع حلفو لا حبسو.

بلحق نويت واحد النوية يا زدحة يا ربحة، قلت والله حتى ندير حتى أنا شي حاجة هي الوالدة ورحاب يساليو من الشغال ويمشيو يرتاحو هاندخل من الباب اللوراني ديال الكوزينة وغادية ندير شي شهيوة نبين فيها حداكتي.

داكشي ليكان الخطة نفدتها على أتم وجه وقرب وقت الفطور وجاو الناس رحبنا بيهم ودكشي ديال الصوابات ليماكايتقادوش، ماكاين هي نافقني نافقك، المهم ودن المغرب وبدينا نحطو فالطبلة شوية كلشي تحط وبقا الطبق ديالي كنت مخبياه وأنا نجيبو وكاتشوفو الوالدة وجه ديالها ولا ماطيشة ملونة، جات حدايا وقرصاتني من رجلي وتاتقول لي : أويلي يا راضية أويلي ونشدك يا المنحوسة اليوم ناكلك بسناني، وأنا كانقول ليها شنو أماما مالكي ؟ واراه شريت دكشي واجد أنا هي عمرتو هي كوني هانيا راه دكشي ساهل وهايكون بنين، أنا كانهدر والواليدة سكتات وهي تقول لي : راضية مال داك السنة اللوارانية فيها هي النص ؟ فيناهو النص التاني ؟ قلت ليها علاياش تاتهدري ؟ دورنا وجهنا قانلقاو لالة نعيمة العشيرة ديال الواليدة كاتاكل من دكشي ليوجدت، واحد الدقيقة كاتسمعو أحححححححححححححح أححححححححححححح مابغاتش السيدة تهدر والو وحلات ليها ولا بغات تخرج…

مع داك أححححححححححححح اللخرة مع المرة عينها هايخرجو من بلاصتهم، مع الواليدة سرات معها النص ديال السنة فين مشا وأنا علقت من فوق الفراش والواليدة وهي تغوت والله اليوم بيا ولا بيك باغا تشوهيني.

رااااااااااااااااااااااااااااااااضيييييييييييييييييييييييييييييييييييييييييييييييييييييية

ترقبوا التتمة على نفس الموعد كل جمعة من شهر رمضان. 

The post سلسلة رمضان : يوميات راضية (الحلقة 2) appeared first on Welovebuzz - عربية.

مرحبا وألف مرحبا ونهار كبير هذا ليجيتو تبعوني وتعرفو عليا، حبس حبس، مني طاح عليا هاد الصواب كامل ؟ وناري الواليدة تسمعني درت ليكم هاد الترحيب كامل أوالله حتى ترضي عليا دنيا وأخرة وتخليني ربع ساعة زايدة وانا كانهدر مع صاحبتي فباب الدار.

المهم بلا مانطول عليكم، حضرتي : الأنسة المصونة راضية. سمية عجيبة ياكو ؟ واسولو الوالدة ليكانت مدوزاها عند جدة ياماتها الأخيرة ديال الحمل، إيوا كانت كاتشوف واحد البرهوش ديال ولد ختها ديما محمق مو، قالت مع راسها والله الواحد ما يصلاح ليه هي التزيار من كرش مو. إيوا تما كانت بداية المشوار، سماتني راضية باش نطلع راضية مرضية ليقالتها ما نقول هي السمع والطاعة الواليدة، ولكن بيني وبينكم، زعما أنا نكون إسم على مسمى ؟ محاااااااااااااااااااااال.

المهم نكمل ليكم، أنا راضية واحد القراية ماشي فحالهم هاضايضاي ماشي فحالهم (راضية سكتينا شوية وكملي الهدرة، ناري والى بدات) كان معاكم الضمير ديالي، هو اللي مرة مرة، كايبان ليا فالبلان وكايبدا يدخل باش يدير ليا العقل.

المهم كيف قلنا، أنا قراية من دكشي الرفيع، الواليد عندو واحد الصمطة معلقة فراس الباب، منين حلينا عينينا وهو كايقول لينا أنا وختي شفتو داك السمطة، أو الله ما تقراو حتى تصبحو معلقين تما. إيوا فالنظر ديالكم أش هانطلعو زعما، قرايييييييييين ومن الطراز العالي. ولكن الواليد والله راه الضرافات الله يعمرها دار، ماشي حيت الواليد ديالي هاداك، ولكن حيت هو واعر وماشي فحالهم هاضايضاي ماشي فحالهم (وا راضية وا باركة راه تسمعك مك كاتغنيها تجي ليك تجبد ليك داك الشعاطط ليفرحانة بيهم).

بالمناسبة، الواليد سميتو محمد والواليدة سميتها خدوج وكايعيطو ليها خديجة، وناري تسمع شي حد عيط ليها خدوج، الهربة الهربة.

أما داك البعلوكة ديال ختي رحاب، هي فعمرها 10 سنين وأنا 15 عام، ما بيناتناش بزاف ولكن فالعقل شتاااااااااان بيني وبينها، واحد السفريطة ما تحملنيش تقول راها ماشي ختي من كرش مي. آه سمحو لي خاصني نقول ماما، حيث زيادة على سميت خدوج، الواليدة كاتبغينا نعيطو ليها ماما قدام الناس وقدام البراني فحالكم خاصني نقول ماما، ولكن هي قدامها، راها مييييي. واخليو هادشي مستور.

حنا ساكنين فواحد الإقامة دايرة فحال شي حي شعبي، ما كاين هي الداخل والخارج، والصديقة الصدوقة ديال الوالدة هي جارتنا فوزية، هادي إلى تلاقات هي والوالدة راه بوحدهوم ينوضو روينة فالبلاد حتى حد ما وقروه فهدرتهم، يا رب السلامة.

وأنا مصاحبة مع بنت فوزية، كاتقرا معايا سميتها سناء، هاد سناء مسكينة مقلوب عليها القفة ما كاتفهم والو ولا كادير راسها ما فاهما والو، هي من واحد النوع ديال الناس ليماكاتصدعش راسها بزاف فالنقاشات والفهامات، كاتسايس مع كلشي.

الحاصول هاد العام رمضان هايدوز مطنطن، واش شفتو هاد الحرارة كاملة، وابزاف خاص واحد الفرفارة تبقا لاصقة لينا فجبهتنا باش نتفوهو، والله لاراه بزاف على الصيام فهاد الشهر، إن هذا لهو الجهاد الأكبر يا ناس.

كيف العادة، أول أيام رمضان كاندوزوه عند جدة. وناري شحال حليلوة جداتي أنا، تاكلوها، عندها واحد الحنيكات كي التفيفيحة، أصلا أنا كاندلعها كانقولها التفيفيحة ديالي، الخبار فراسكم كاتنزل عليا بعكازها، ولكن هانيا دكشي بحلاوتو.

المهم أصحابي و صحاباتي، الوالدة قاتلك والو أراضية غاديا تلبسي الجلابة ليوجدت ليك، وأنا حالفة ما عندي لا معا جلابة ولا تقليدي وما كانفهم حتى حاجة فدكشي. المهم لبستها بزز مني نظرا للتهديدات الصاروخية ليخرجات من عين الواليدة، واراه شوفة من عندها  الله حتى دوبو فبلاصتكم، وخدووووووج هادي وأجركم على الله.

صافي هاحنا لبسنا الجلابة وداك السفريطة ديال ختي حتى هي لبساتها  ليقالتها الواليدة كاتبعها فيه،ا أصلا هي داك العزيزة المفشة عندها، وأنا هي حقل التجارب ديال الدار. ركبنا مع الواليد فالطونوبيل وزدنا : مشينا عند جدة كانت باقا نص ساعة على الفطور. مشينا لقينا كلشي مجموع، سلمنا على الجميع وعلى جدة التفيفيحة ديالي، ومشيت أنا وبنات خالتي لبيت واحد أخر باش نهضرو بيناتنا وكل وحدة كاتعاود كيداز ليها أول نهار ودكشي.

شوية كانسمع جدة كاتعيط ليا وأنا بلا مانشوف مشيت كانجري عندها للكوزينة نشوفها أش بغات وهي يالاه قالت، « أراضية بنتي مد لي داك الزلايف عافاك » وأنا يالاه جبدتهوم وأنا نتعكل فالجلابة طحت وتسمعات داك بشاااااااااااااااااااااااااااااااااااخ ديال الزلايف، ماحسيتش براسي على وجه الكرة الأرضية مع داك بشاخ معا داك الدخلة ديال الواليدة وكانسمع بالغوات « راااااااااااااااااااااااااااااااااااااااااااااااااااضيييييييييييييييييييييييييييية » …

ترقبوا الحلقة القادمة يوم الجمعة في نفس الموعد من كل أسبوع خلال شهر رمضان.

The post سلسلة رمضان : يوميات راضية (الحلقة 1) appeared first on Welovebuzz - عربية.